ދިރިއުޅެން ޖެހިފައި މިއޮތީ ހާސްކަން ބޮޑު މާހައުލެއްގަ އެވެ. ހުރިހާ ކަމެއްގައި އެކަކު އަނެކަކަށް ވުރެ ކުރިއަރަން ކުރާ މަސައްކަތުގެ ވާދަ ބޮޑެވެ. ހާއްސަކޮށް ކިޔެވުމުގެ ވާދަވެރިކަން މީގެ ކުރިން ނެތް ވަރަށް މިހާރު އެބަ އޮތެވެ.
ވިއްސަކަށް އަހަރު ކުރިން، ސަރުކާރުގެ ވަޒީފާއަކަށް ވަންނަން އަސާސީ ތައުލީމުގެ މިންވަރެއް ފުދެ އެވެ. މިހާރު އާދައިގެ އޮފީސް އެޑްމިން ވަޒީފާއަކަށް ބިޒްނަސް އެޑްމިނިސްޓްރޭޝަނުން ޑިގްރީއަކާއި ގުޅޭ ދާއިރާއަކުން ދެތިން ޕްރޮފެޝަނަލް ސެޓްފިކެޓް ހުށަހަޅައިގެން ވެސް ވަޒީފާ އަތުޖެހޭނެ ކަމުގެ ޔަގީން ކަމެއް ނެތެވެ. މިއީ ކިޔެވި މިންވަރަށް ބަލާއިރު އެކަށީގެންވާ ވަރާ ގާތަށް ވެސް މުސާރަ ނުލިބޭ ވަޒީފާއަކަށް ހޯދަން ހުރި އުނދަގުލެވެ. ކިޔެވުމުގެ ވާދަ ބޮޑުވަނީ މިހެންވެ އެވެ. ފަންސާހާ ކައިރިވެފައި ހުރި ދައްތަ ވެސް މިހާރު ޑިގްރީ އަށް ކިޔަވަނީ އެވެ.
ޒަމާނާއި މުޖުތަމައަށް އައި މި ބަދަލުގައި އެންމެ ބޮޑު ޕްރެޝަރެއް އޮތީ ފުރާވަރުގެ ކުދިންނަށެވެ. ވަޒީފާގެ ފުރުސަތުތައް މަދު މާހައުލެއްގައި ހަމައެކަނި ރަނގަޅު ގްރޭޑެއް ހޯދުމަކުން ނުފުދެ އެވެ. އެންމެން އެއް ކަމެއް ކުރާއިރު، ތިމާގެ ފަޅި ތަފާތުކޮށްލެވޭނެ ގޮތެއް ހޯދަން ޒުވާން ފުރައިގައި ކުރިން ކުރާ ފިކުރު، މިހާރު ފެށެނީ ޅަފުރައިގަ އެވެ. މި ހުރިހާ ފިއްތުންތަކާ އެކު، ނަފްސާނީ ފަރުވާ ހޯދަން ކުޑަކުޑަ ކުދިން އަތުކުރީ ހިފައިގެން މަންމަމެން ކްލިނިކްތަކަށް ހިނގާ މިންވަރު އިތުރުވާތީ ނަފްސާނީ ފަރުވާދޭ ފަރާތްތަކުން ވެސް މިހާރު ކަންބޮޑުވެ އެވެ.
އެންޒައިޓީ އަކީ ކޮބާ؟
ކުރުކޮށް ބުނާ ނަމަ، އެންޒައިޓީ އަކީ “މާޔޫސް” ވުމާ އެއްގޮތް ކަމެކެވެ. އެންޒައިޓީ ތަހައްމަލުކުރާ މީހާ، ފިކުރު ބޮޑުވާ ގޮތަށް ވިސްނާނެ އެވެ. މިއީ ޑިޕްރެޝަނާ ވެސް އެއްގޮތް ބަހެކެވެ. އެކަމަކު އެއަށްވުރެ އާންމު ހާލަތެކެވެ. މިސާލަކަށް ވަކި ކަމެއް ކުރަން ބިރުގަތުން، ނުވަތަ މީހެއްގެ އުންމީދުތަކާ އެއްވަރަށް މަސައްކަތް ނުކުރެވުން ފަދަ ކަންކަމުން އެންޒައިޓީ އަށް ގޮސްދާނެ އެވެ. މީގެ ގެއްލުން ބޮޑުވަނީ، ކުރާ ފިކުރުތައް ދިރިއުޅުމުގެ ކާމިޔާބީ އަށް ހުރަސް އަޅާ ހިސާބުންނެވެ.
ކުދިން އެންޒައިޓީ ތަހައްމަލު ކޮށްފާނެ ސަބަބުތައް ބައިވަރެވެ. މަންމަ އާއި ބައްޕަ ދުރުވުން، އެކު އުޅޭ ކުދިންގެ މަލާމާތް، ވަކި ޓީޗަރަކު ދެކެ ޖެހިލުން ވުން ނުވަތަ ޖިންސީ ގޯނާގެ ޝިކާރައަކަށް ވުން ކަހަލަ ސަބަބުތައް ހިމެނެ އެވެ. މިއީ އާންމު ބޮޑެތި ސަބަބުތަކެވެ. އިތުރަށް ކޮން ކަމެއް ހެއްޔެވެ؟
ފުރާވަރުގައި ކުދިން ތަފާތު ކަންކަން ތަޖުރިބާކުރެ އެވެ. އާކަންކަން ތަޖުރިބާކޮށްލަން ބޭނުންވެ އެވެ. ސޯޝަލް މީޑިއާ ބޭނުންކުރަން ފަށައެވެ. މި ހުރިހާ ކަމަކާ އެކު ސްކޫލް ސްޓްރެސް އާއި ގުޅިފައިވާ އެންމެންގެ އުންމީދުތަކާ މެދު ފިކުރު ކުރަންޖެހެ އެވެ. އޭގެ ސަބަބުން އެކުދިންގެ ކިޔެވުމަށާއި އުޅުމާއި ގުޅުން ތަކަށް ބަދަލު އަންނަން ފަށައެވެ. އެކުދިންގެ އުމުރާ ނުގުޅޭ މަޢުލޫމާތާއި މަންޒަރުގެ ދުނިޔެއަށް އެކުދިން ގެބިގެންދަނީ އަރައިނުގަނެވޭހައި ފުންމިނަށެވެ.
ކުދިންގެ ފުރާވަރުގެެ ދުވަސްވަރު ސޯޝަލް މީޑިއާގެ ވާޞީލަތްތަކާއި ވީވަރަކުން ދުރުކުރުމަށް ބެލެނިވެރިން ޙާއްސަ ސަމާލުކަމެއް ދިނުމަކީ ދަރިވަރުންގެ ފުރާވަރުގައި އެކުދިންގެ އުޅުމަށް ހެޔޮބަދަލެއް ގެނައުމަށްޓަކައި ކުރެވިދާނެކަމެކެވެ. ދަރިންގެ އުޅުމާއި ގުޅުންތައް ބަލައި ފާރަވެރިވުން މުހިއްމެވެ.
Leave a Reply