“ބިޔޯންޑް އިމޭޖިނޭޓިވް އޮޕްޓިމިސްޓިކް ނިފްޓީ އައިލެންޑް ކުލަބް (ބަޔޯނިކް) “ގެ ނަމުގައި ށ. މާއުނގޫދޫގައި ކުޅިވަރު ކުލަބެއް ރަޖިސްޓްރީކޮށް ރަސްމީކޮށް އިފްތިތާހް ކޮށްފި އެވެ.
09/09/2022 ވީ ހުކުރު ދުވަހުގެރޭ މާއުނގޫދޫ ސުކޫލްގައި ބޭއްވި ރަސްމިއްޔާތުގައި އެ ކުލަބު ރަސްމީކޮށް އިފްތިތާހު ކޮށްދެއްވީ ށ އަތޮޅު ކައުންސިލްގެ ރައީސް މުޙައްމަދު ޝިޔާމްއެވެ.
ކުލަބް ބަޔޯނިކް އިފްތިތާހް ކޮށްދެއްވުމަށް ފަހު ށ އަތޮޅު ކައުންސިލްގެ ރައީސް ވިދާޅުވީ، ރަށްރަށުގެ ތަރައްޤީއަށް ކުރެވޭ މަސައްކަތްތަކުގައި ކުލަބު ޖަމްޢިއްޔާތަކުގެ ބައިވެރިވުން މުޙިއްމު ދައުރެއް އަދާކުރަމުންދާކަމަށެވެ. އަދި ށ އަތޮޅު ކައުންސިލުން ކުލަބް ޖަމްޢިއްޔާތައް ބާރުވެރިކޮށް ހަރުދަނާ ކުރުމަށް ތަފާތު ޕްރޮގުރާމްތައް ކުރިއަށް ގެންދަމުންދާކަމަށެވެ. އަދި ށ އަތޮޅުގެ ކުލަބް ޖަމްޢިއްޔާތަކުގެ ތެރެއިން އެންމެ ރަނގަޅަށް ހިންގާ ކުލަބް ޖަމްޢިއްޔާތައް ފާހަގަކޮށް ކޮންމެ އަހަރަކުވެސް 3 ކުލަބް ޖަމްޢިއްޔާއަކަށް 75000 ރުފިޔާގެ މާލީ އެހީތެރިކަން ފޯރުކޮށްދިނުމަށް ނިންމާފައިވާކަމަށެވެ. އަދި މިޕްރޮގުރާމް ކުރިއަށް އޮތް 5 އަހަރުދުވަހުވެސް ކުރިއަށް ގެންދަވާނެކަމުގެ ޔަޤީންކަން އެރުވިއެވެ.
އެ ރަސްމިއްޔާތުގައި ވާހަކަފުޅުދައްކަވަމުން ކުލަބް ބަޔޯނިކްގެ ރައީސް ޢުބައިދުﷲ މުޙައްމަދު ވިދާޅުވީ، ބަޔޯނިކްގެ މަގްސަދަކީ ކުޅިވަރުގެ ތެރެއިން މުޖުތަމަޢުގެ އެކުވެރިކަން އާލާކޮށް ހަށިހެޔޮ ޒުވާން ޖީލެއް ބިނާކުރުންކަމަށާއި، ޒުވާނުންނަށް އެކި އެކި ރޮގުތަކުން ފަހި ފުރުޞަތުތައް ތަނަވަސްކޮށްދީ ޒުވާނުން ބާރުވެރިކުރުމަށް ގިނަ ހަރަކާތްތަކެއް ރާވައި ހިންގުމަށް އަމާޒުކުރެވިފައިވާކަން ފާހަގަކުރެއްވިއެވެ. އަދި ރަށުގެ ތަރައްޤިއަށް ކުރެވޭ ކަންކަމުގައި އެންމެ އިސްސަފުގައި އަބަދުވެސް މިކުލަބް ދެމިއޮންނާނެކަމަށް ވިދާޅުވިއެވެ.
2006 ވަނަ އަހަރުން ފެށިގެން މާއުނގޫދޫގައި ހަރަކާތްތެރިވަމުން އަންނަ ބަޔޯނިކް ރަސްމީކޮށް ކުލަބެއްގެ ގޮތުގައި ރަޖިސްޓަރީ ކޮންފައިވަނީ 26 ޖޫން 2022 ގައެވެ. ރަޖިސްޓުރީ ކުރުމުގެ ކުރިންވެސް މިކުލަބް ފާހަގަވެފައިވަނީ ކުޅިވަރުގެ އެކިއެކި ކަންކަމުގައި މާއުނގޫދޫގައި ވަރަށް ހަރަކާތްތެރި ކުލަބެއްގެ ގޮތުގައެވެ. ރަސްމީ ހައިޞިއްޔަތު ލިބިފައިވާ އިރު މިއަދާ ހަމައަށް މިކުލަބްގައި 100 އަށް ވުރެ ގިނަ މެންބަރުން ތިބިކަމަށް ކުލަބްގެ ރައީސް މައުލޫމާތުދެއްވިއެވެ.
ރޭގެ ރަސްމިއްޔާތުގައި ށ އަތޮޅު ޕޮލިސް ކޮމާންޑާރ އިންސްޕެކްޓާރ އޮފް ޕޮލިސް އިބްރާހިމް ވަޙީދު އާއި މާއުނގޫދޫ ކައުންސިލްގެ ރައީސް އަދި މާއުނގޫދޫގެ އެނިހެން ކުލަބް ޖަމްޢިއްޔާތަކުގެ ވެރިންނާއި، ކުލަބް ބަޔޯނިކްގެ ގިނައަދަދެއްގެ މެންބަރުންވެސް ބައިވެރިވިއެވެ.
Leave a Reply