އަތުން ތަރުބިއްޔަތު ކުރުމުން ކުދިންގެ ވިސްނުން ކޮށިވޭ: ދިރާސާ

ދަރިން ތަރުބިއްޔަތު ކުރުމަށް ޓަކައި އެކުދިންގެ ގައިގާ ތަޅައި، ތަންތަނުގައި އައްސައި ހެދި ޒަމާން ނިމިއްޖެއެވެ. އެކަހަލަ ކަމެއް ކުރާ މައިންބަފައިން މިހާރު އެހާ ގިނައެއް ނުވާނެއެވެ. އެކަމަކު ކުދިންގެ އަތުގައި ބާރަަށް ހިފެހެއްޓުމާއި ގައިގައި އަޅައި ކޮށްޕައިލުން ކަހަލަ ކަންތައްތައް ކުރާ މައިންބަފައިން އަދިވެސް މަދެއް ނޫނެވެ. ތަރުބަވީ އިލްމުގައި މިހުރިހާ ކަމެއް ވެސް ހިމެނެނީ ”ފިޒިކަލް ޑިސިޕްލިން“ ނުވަތަ ޖިސްމާނީ ގޮތުން ކަންތައްތައް ކޮށްގެން ތަރުބިއްޔަތުކުރުމުގެ ތެރޭގަ އެވެ.

ޖާނަލް އޮފް ދަ އެމެރިކަން އެކަޑަމީ އޮފް ޗައިލްޑް އެންޑް އެޑޮލޮސެންޓް ސައިކޭޓްރީ ގައި ޖެހި ދިރާސާ ރިޕޯޓެއްގައި ބުނީ އެގޮތަށް ކަންތައް ކުރުމާއި އެކު، ވިސްނުމުގެ މަސައްކަތް ކުޑަކުރުުމުން ކުދިންގެ ހެދިބޮޑުވުމަށް ހުރަސް އެޅޭ ކަމަށެވެ. ޔުނިސެފްގެ އެހީގައި ދުނިޔޭގެ އެތައް ގައުމެއްގައި ކުރިއަށް ގެންދާ ސާވޭއެއް ކަމަށްވާ ”މަލްޓިޕުލް ކްލަސްޓާ ސާވޭ“ގެ ތެރެއިން އެއްކުރި މައުލޫމާތުން ކޮށްފައިވާ އެ ދިރާސާއިން ދެއްކި ގޮތުގައި ފިޒިކަލް ޑިސިޕްލިން އާއި ވިސްނުމުގެ މަސައްކަތް ކުޑަކުރުން ( ކޮގްނިޓިވް ޑިޕްރިވިއޭޝަން) ވަނީ ކުދިން ރަނގަޅަށް ހެދިބޮޑުނުމުގެ މައްސަލައާ އެތައް ގޮތަކުން ގުޅިފައެވެ. ޔުނިސެފްގެ ސާވޭ ކުރިއަށް ގެންދަނީ އެގި ގައުމުތަކެއްގެ ގިނަ އަދަދެއްގެ ގޭބިސީއަށް ޒިޔާރަތްކޮށް މައުލޫމާތު އެއްކޮށްގެނެވެ.

ވިސްނުމުން މަހްްރޫމްކުރުން ނުވަތަ ކޮގްނިޓިވް ޑިޕްރިވިއޭޝަނާއި ފިޒިކަލް ޑިސިޕްލިން އަކީ ކުދިންގެ ހެދިބޮޑުވުމަށް ހުރަސް އެޅޭ ކަންތައްތައް ކަން ކުރިން ވެސް އެނގެއެވެ. އެކަމަކު އެ ދެކަންތައް ގުޅިލާމެހުމުން، ހެދިބޮޑުވުމުގެ ތެރޭގައި ހިމެނޭ ވަކި ހާއްސަ ކަންތައްތަކަކާއި ގުޅިފައިވާކަން މިހާ ސާފުކޮށް އެނގުނު މިއީ ފުރަތަަމަ ފަހަރެވެ.

ދިރާސާގައި 17 ގައުމަކުން 29،792 ކުދިންނާއި އެކުދިންގެ މައިންބަފައިން ބައިވެރިކުރި އެވެ. އެއީ އުމުރުން ތިން އަހަރާއި ހަ އަހަރާ ދެމެދުގެ ކުދިންނެވެ. އެ ގޭބިސީތަކުގައި އޮތް ޖިސްމާނީ ބާރުގެ ބޭނުންކޮށްގެން ތަރުބިއްޔަތު ކުރުމުގެ ކަންތައްތަކުގެ ތެރޭގައި ހިމެެނީ ވަރަށް އާދައިގެ ކަންތައްތަކެވެ. އެއީ އަތުގައި ނުވަތަ ފައިގައި މަޑުމަޑުން ޖަހައިލުން ކަހަލަ ކަންތައްތަކެވެ. ވިސްނުުމުން މަހުރޫމްކުރުމުގެ ކަންތައްތަކުގެ ތެރޭގައި ހިމެނެނީ ފޮތެއް ކިޔައި ނުދީ ދުވަސްތަކެއް ދިއުން ނުވަތަ ގޭގައި ކިޔާނެ ފޮތެއް ނެތުން ކަހަލަ ކަންތައްތަކެވެ.

ދިރާސާއިން އެނގުނު ގޮތުގައި ކުޑަކުދިން މީހުންގެ ތެރެއަށް ނުކުމެ އިތުބާރާއި އެކު ނުކުމެ އުޅުމުގެ ޖަޒުބާތީ ގާބިލުކަން ( ސޯޝޯއިމޯޝަނަލް އެބިލިޓީ) އުފެދުން ލަސްވުުމަށް މެދުވެރިވާ ސަަބަބުތަކުގެ 50 ޕަސެންޓަކީ ފިޒިކަލް ޑިސިޕްލިން އެވެ. އެއީ ކޮގްނިޓިވް ޑިޕްރިވިއޭޝަނަށް ވުރެ ވެސް ބޮޑަށް ކުދިންނަށް ނަފްސާނީ ގޮތުން އަންން ޖެހޭ އެ ތަރައްގީއަށް ހުރަސް އަޅާ ކަމެއް ކަން ވެސް އެ ދިރާސާއިން އެނގުނެވެ. ދިރާސާއިން އެނގުނު އަނެއް ކަމަކީ ވިސްނުން ބޭނުންކުރުމުން މަހުރޫމްކުރުމަކީ ކޮގްނިޓިވް ޑިވެލޮޕްމަންޓް (ސިކުނޑި ތަރައްގީވުން) އަށް އެޅުމަށް މެދުވެރިވާ ސަަބަބުތަކުގެ 47 ޕަސެންޓް ކަމެވެ.

މި ދިރާސާއިން ހޯދިފައި މިވާ ހޯދުންތަކުން އެނގޭ ގޮތުގައި ކުދިން އަދަބުވެރިކުރުވުމަށް ޖިސްމާނީ އަދަބުތައް ދޭ ނަމަ އެކުދިންގެ ޅަނދޮޅުކަމެއް ނުހުންނާނެއެވެ. އެއީ ޖިސްމާނީ ގޮތުން ހެދިބޮޑުވުމަށް ހުރަސްް އެޅި، އާއްމު އިސްކޮޅަަށް ދެމިލުމުގެ ކުރިން ޖިސްމާނީ ގޮތުން ހަށިގަނޑު ފުރާ ފުރިހަމަވާ ސަބަބަކަށް އެހެންވީމާ އެބަ ވެއެވެ. މައިންބަފަައިން ދަންނަންވީ ކަމަކީ ޖިސްމާނީ ގޮތުން އަދަބު ނުދީ ވެސް ކުދިން އަދަބުވެރި ކުރެވޭނެ ގޮތްތައް ހުންނާނެ ކަމެވެ. ހެދިބޮޑުވުމަށް ހުރަސް އެޅޭ ކަންތައްތަައް ނުކޮށް ވެސް ދެވޭނެ އަދަބުތައް ހުންނާނެ އެވެ.

ދިރާސާއިން ދަސްކުރަން ޖެހޭ އަނެއް ފިލާވަޅަކީ ކުދިންގެ ވިސްނުމުގެ ބާރު ބޭނުންކުރަން ޖެހޭ މަަސައްކަތެއް ކޮންމެ ދުވަހަކު ވެސް ކުރުވަން ޖެހޭ ކަމެވެ. ސްކޫލް ބަންދު ދުވަސްތަކުގައި ވެސް ކޮންމެވެސް އެއް ވަގުތެއްގައި ފޮތެއް ކިއުން ނުވަތަ އެއްޗެއް ލިއުން ފަދަ ކޮންމެވެސް ކަމެއް ކުދިން ލައްވައި ކުރުވަން ޖެހޭކަމެވެ.