ގިނަ ރައްޓެހިންތަކެއް ތިބުމުގެ މާނައަކީ، އެ އެންމެން ތިބާދެކެ ގަޔާވެއެކޭ ނޫނެވެ. މީހުންގެ ލޯތްބާއި އިހުތިރާމް ލިބޭނީ، ވަކި ސިފަތަކެއް ހުރުމުންނެވެ. އެގޮތުން މިފަހަރު މި ކިޔައިދެނީ، އެކުވެރިންގެ މެދުގައި މަޤުބޫލު މީހަކަށް ވާން ހުންނަންޖެހޭ ބައެއް ސިފަތަކެވެ.
1. ތެދުވެރިކަން
އެކުވެރިޔާ ކިތަންމެ ހިތްހަމަނުޖެހޭ ކަމަކަށް ވިޔަސް، ޙަޤީޤަތް ހާމަކުރުމުގައި ފަސް ނުޖެހޭށެވެ. ތެދުވެރިކަމުގެ ސިފައަކީ އެހެން މީހުންގެ އިތުބާރު ހޯދުމަށް އެންމެ މުހިއްމު އެއް ސިފައެވެ.
2. ރައްޓެހިންގެ ހާލު ބެލުން
ކިތަންމެ ބުރަކޮށް އުޅެމުން ވެސް، ހަފްތާއަކު އެއްފަހަރަކު ނަމަވެސް ރައްޓެހިންގެ ހާލު އަހުވާލު ބަލަން ވާނެއެވެ. އޭރުން ތިބާއަކީ އެމީހުންނާ ދޭތެރޭ ވިސްނާ، ހެޔޮއެދޭ އެކުވެރިއެއް ކަން އެމީހުންނަށް އެނގިގެންދާނެއެވެ. އޭގެ ބަދަލުގައި ރައްޓެހިން ކުރާ މެސެޖުތަކަށް އަޅައިނުލައި، ފޯނަށް ގުޅުމުން ވެސް ޖަވާބު ނުދީ ހުންނަ ނަމަ އެމީހުން ތިބާއާ މަޑުމަޑުން ދުރުވާނެއެވެ.
3. ނުކޮށްދެވޭ ވަރު ކަމަކަށް އެއްބަސް ނުވުން
ރައްޓެއްސަކު ކަމަކު އެދުމުން، ފުރަތަމަ އެއި ތިބާއަށް ޔަގީނުން ވެސް ކުރެވޭނެ ވަރުގެ ކަމެއްތޯ އަމިއްލަ ނަފްސާ ސުވާލު ކުރާށެވެ. އޭގެ ބަދަލުގައި، ނުވާވަރުގެ ކަމަކާ ހަވާލުވެގެން އެންމެފަހުން އެކަން ކޮށްނުދެވުމުން ފަހުވަގުތު ބަހަނާ ދެއްކުން ކަމަކު ނުދާނެއެވެ. އޭރުން ރައްޓެހިން ތިބާދެކެ ފޫހިވާނެއެވެ. ތަނަކަށް ދާން ކިޔާފައި ފަހުވަގުތު ނުދެވޭނެ ކަމަށް ބުނުން ވެސް މީގެ ތެރޭގައި ހިމެނޭނެއެވެ.
4. ސިއްރުތައް ހިފެހެއްޓުން
ރައްޓެއްސަކު ތިބާއަށް ވަރަށް އިތުބާރުކޮށްފައި ކިޔައިދޭ ސިއްރެއް ގޮސް އެހެން މީހުންގެ ކައިރީގައި އެއްގޮތަކަށް ވެސް ކިޔައިގެން ނުވާނެއެވެ. މީގެ އިތުރުން، އެކަކު ނެތްތާނގައި ދެންތިބި މީހުންގެ ކުރިމަތީގައި އޭނާގެ ނޭދެވޭ ވާހަކަތައް ދެއްކުމަކީ ވެސް ތިބާގެ އަގު ވެއްޓޭނެ ކަމެކެވެ.
5. ހެޔޮ ނަސޭހަތް ދިނުން
ހެޔޮއެދޭ ރައްޓެއްސަކަށް ވެވޭނީ، ހެޔޮ ނަސޭހަތް ދީގެންނެވެ. އެގޮތުން ގާތް ރައްޓެއްސަކު ގޯސް ކަމެއް ކުރަން އުޅުމުން، ރައްޓެއްސަކަށް ވީތީއޭ ކިޔައި އެކަމަށް ހިތްވަރު ދިނުމުގެ ބަދަލުގައި، ހެޔޮ ގޮތް ކިޔައިދޭން ވާނެއެވެ. ރަނގަޅު ރައްޓެހިންނަކީ ރަނގަޅު ނަސޭހަތް ދޭ މީހުންނެވެ.
މީގެ އިތުރުން ވެސް، އުފާތަކަތާއި ހިތާމަތަކުގައި ރައްޓެހިންނާ އެންމެ ކައިރީގައި ހުރުމަކީ އެމީހުންގެ ލޯބި ލިބޭނެ ކަމެކެވެ. ރައްޓެހިންނަށް ލިބޭ ކާމިޔާބީ ފާހަގަކުރުން ވެސް މީގެ ތެރެއަށް ވަންނާނެއެވެ. އޭގެ ނަތީޖާއެއްގެ ގޮތުން، ތިބާއަށް ހިތާމައެއް ކުރިމަތިވުމުން އެމީހުން ވެސް ތިބާއަށް އެހީވެދީ ހިތްވަރު ދޭނެއެވެ. އަދި ތިބާގެ ކޮންމެ ކާމިޔާބީއެއްގައި އެމީހުން ބައިވެރިވާނެއެވެ.
ނަމަވެސް އެންމެންގެ ރުހުން ލިބުމަކީ ވާނެ ކަމެއް ނޫން ކަން ދަންނަން ވާނެއެވެ. ތިބާ ކިތަންމެ ރަނގަޅަށް ކަން ކޮށްދިނަސް، ނުރުހުމުގެ ލޮލަކަށް އެޔެއް ނުފެންނާނެއެވެ.
Leave a Reply