ފަތިސްދަމުގެ ފިނިއަސަރުތައް މަޑުމަޑުން މެންދަމެއްގެ ހުވަފެނީ ހަނދާންތައް އާކުރަނީއެވެ. އިރާކޮޅުންސުރެ ދިން ހަނދުވަރުގެ ރިހި އަލިތައް ނިދާފައިތިބި އެކަނިވެރީން އެކަނިކޮށްލާފައި، އޮއްސިގެންދިޔަ ހަނދުގެ ފަހަތުން ހިގައްޖެއެވެ.
އެ ޤުދުރަތީ ހަނދާއި، އެތޫނު ހަނދުވަރު ދުނިޔެއާއި ވަކިވެގެންދަމުން ވަދާޢުގެ އެންމެ ފަހު ވަޤުތު އެކަނިކޮށްލާފައިދިޔަ އެކަނިވެރިންގެ ތެރެއިން އެކަކީ، ޒުވާން ރިޔާޟުއެވެ. އެހެނަސް އޭނާގެ ޒުވާން ހިތާއި އެހިތުގެ ހިއްސުތައްވަނީ އެއްވެސް އެއްޗެއް އިހުޞާސްނުވާފަދަ ހާލެއްގައި ހަބަރު ހުސްވެފައެވެ. އާދެ! އޭނާވަނީ ގަދަ ހުމެއްގައެވެ.
މިދެންނެވި ފަތިސް ދުނިޔެއަށް ހޭލަމުން އައިއިރު ރިޔާޟު އޮތީ ހއ.ދިއްދޫ ދިލްކަޝް ގޭގައި ކަމަށްވިޔަސް، އޭނާއަކަށް ކުޑަކޮށްވެސް އެކަމެއްނޭންގެއެވެ. އޭނާގެ ކައިރީގައި ފަރުވާތެރިކަމާއެކު ޙިދުމަތްކުރަންހުރި ރީޖަނަލް ހޮސްޕިޓަލްގެ ނާރސް ރިޔާޟުއަށްޓަކައި ކިތަންމެ ޚިދުމަތެއް ކުރިނަމަވެސް އެކަމެއްވެސް އިހުސާސްއެއް ނުވެއެވެ. އެހެނަސް އެނާރސް އޭނާއަށްޓަކައި ވަމުންގެންދަނީ ޤުރުބާނީއެކެވެ. ރެޔާ ދުވާލުއެވެ. ނިންޖާއި އަރާމުންނެވެ. ކެއުމާއި ބުއިމުންނެވެ.
“ދެންމެއަކު ލޯ ހުޅުވާލިހެންވެސް ހީވިއެވެ. ނަމަވެސް އޭނާގެ ވަރު އަދިވެސް މާ ދެރައީ އެވެ. ހުން…….”
ނާރސް އޭނާގެ އިޚްލާސްތެރިކަން އިންތިޙާއަށް ގޮސްފައިވާ އަޑުން ކައިރީގައި އިން މީހަކަށް ބުނެލަދިނެވެ.
އެވަގުތު އެނާރސް މުޅިދުނިޔެއަށް ސިއްރުންހެން އޭނާގެ ލޯ ފޮހެލިއެވެ. އެހެނަސް ޝައްކެތްނެތެވެ. އެތޫނު ދެލޮލުން އޭނާ އަދު ފޮހެލެވުނީ ކަރުނައިގެ ފުން ކަނޑަކުން ކެތްތެރިކަން އޭގެ ނިހާޔަތަށް ގޮސްގެން އުތުރިގަތް، ބާންޏެއްގެ ބައެކެވެ. އާދެ! ރިޔާޟު އަށްޓަކައި އޭނާގެ ހާލަށްޓަކައި ހަމްދަރުދީއެއްގެ ނަމުން ނަންލިބިގެން އޮހުނު ކަރުނައެކެވެ.
ފަތިސްވެއްޖެއެވެ. ހާގޮވައިފިއެވެ. އަލި ވެއްޖެއެވެ. ދޫނިތައް ހޭލައިފިއެވެ. ނަމަވެސް ރިޔާޟުއެއް ހެއެއް ނުލައެވެ.
އިޚުލާސްތެރި ނާރސް އާޠިފާ މަޑުމަޑުން އެނދުގެ ކައިރީގައި އިށީންދެލިއެވެ. ގޭތެރޭގައި ފަތިހެއްގެ ހަރަކާތްތެރިކަން ފެށީގެންދާއިރު އާޠިފާގެ ހިތުގައި ހަވީރެއްގެ އިރުއޮއްސުމެއްގެ އަސަރުތަކެއް ވެރިވަމުން ދަނީއެވެ. ދެންމެ ދެންމެ އޭނާގެ ހިތުގެ ހިޔާލާތުގެ އިރު ނުވަތަ ހަޔާތުގެ އުފާތަކުގެ އިރުކަމަށް ހިމެނޭ ރިޔާޟު “އޮއްސިގެން ހިނގައިދާނެކަމުގެ” ފިކުރުތަކުން އާޠިފާވަނީ ހިތްދަތިވެފައެވެ. ނަމަވެސް މިހިތްދަތިކަން ނުވަތަ އޭނާގެ ހިތުގެ މިރިހުން ކެތްތެރިކަމާއެކު ރައްކާކޮށްފައިވަނީ، ހިތުގެ އަޑީގައެވެ. ޒަޙަމްވަމުން އަދި ކަތިލެވެމުންދާ އޭނާގެ ހިތުގެ އެންމެ އަޑީގައެވެ. ސަބަބަކީ، އޭނާ ރިޔާޟު ދުށީ، އަދި އޭނާދެކެލޯބިވީ އޭނާގެ ބަލިއެނދުގައި ޚަބަރު ހުސްވެފައި އޮއްވައެވެ. ރިޔާޟު ބަލިމީހަކަށް އާޠިފާ ނަރުހަކަށް ވެފައިވަނިކޮށެވެ. އަދި ކަންހުރިގޮތުން އޭނާ ފާލުކުރަންއެދޭ ލޯބީގެ ޝުޢޫރުތައް “ފާޅުކުރެވެނީ” ތުންފަތުގައި އިގުޅާލަދެވޭ ފަނިތިއްކެއްގެ ގޮތުގައެވެ. ނުވަތަ ރިޔާޟު ގެ ލޭހޮޅިއަށް ޖަހާލަދެވޭ އިންޖިކުޝަނެއްގެ ގޮތުގައެވެ. ދެން އެއަށްވުރެ އިޚްލާސްތެރިގޮތެއްގައި ނިތްކުރީގައި ފިރުމާލަދެވޭ ފިރުމާލުންތަކުންނެވެ. އެހެންނަމަވެސް……. ރިޔާޟު އަށް އެހިތުގެ ޝުޢޫރުތައް އިނގޭވަރަށްވުރެ އޭނާވަނީ މާދުރުގައެވެ.
އެދުވަހުގެ ހެނދުނާއި، މެންދުރު މާޒީއާއި އެކުވި އުޞޫލުން ހަވީރުވެސް ގެއްލިގެން ހިގައްޖެއެވެ. އަނެއްރޭގެ އިރާކޮޅުން ފެށިގެން މެންދަމާ ހަމައަށްވެސް ދިޔައީ ފާއިތުވެގެންނެވެ. ގޭގެ އެންމެނާއި ރަށުގެވެސް ރަނގަޅުކަހަލަ އެންމެންހެން ވަނީ އެގެއަށް ޖަމާވެފައެވެ. ރިޔާޟު އަކީ މާލޭގެ އިއްޒަތްތެރި ޒުވާނެއްކަމުން އަދި ޙާއްޞަކޮށް އޭނާއަކީ އިންޑިޔާގައި ހުންނަ ދިވެހި ދަޢުލަތުގެ އެންބަސީގެ ސެކެޓަރީކަމުން އޭނާގެ ޤަދަރާއި އިޢްޒަތްވެސް އެރަށުގައިވަނީ ވަރަށް މަތިވެރި ދަރަޖައަކަށް އުފުލިފައެވެ.
ކަންދިމާވިގޮތަކީ ރިޔާޟު އޭނާގެ ވަޒީފާއިން ޗުއްޓީއެއް ނަގައިގެން މާލެ އައުމަށްފަހު، އަރާމުކޮށްލުމުގެ ގޮތުން، ހއ. ދިއްދޫއަށް ޒިޔާރަތްކޮށްލެއްވީއެވެ. އޭނާގެ އާއިލާގެ ވަރަށް ޙާއްޞަ ރަޙްމަތްތެރިކަމެއް ހިގާފައިވާ ރަށެއްކަމުންނެވެ. ދިއްދޫގައި މަޑުކޮށްލެއްވިތާ ގާތްގަނޑަކަށް މަސްދުވަސްވީތަނާ ކުއްލިއަކަށް އޭނާއާއި ކުރިމަތިލީ ގަދަ ހުމެކެވެ. ހަމަ ކުއްލިއަކަށް އޭނާގެ ހަށިގަނޑު ނެތިވެދާން ކައިރިވާ ހިސާބަށް ނިކަމެތިކޮށްލައިފިއެވެ. ކަންދިމާވިގޮތުން އެބަލީގައި ރިޔާޟު އޮށޯންނެވިތަނާ ހެން ރީޖަނަލް ހޮސްޕިޓަލްއިން ތިލަދުންމަތީގައި އާންމު ޞިއްޙަތައްޓަކައި ކުރަމުންދިޔަ ދަތުރެއްގައި ދިއްދޫއަށް އައީއެވެ. އެވަފުދުގައި އައި ތަޖުރިބާކާރު ޑޮކްޓަރު އެންތަނީ ރިޔާޟު ބެއްލެވުމަށްފަހު ވަރަށް ރަނގަޅަށް ބޭސްކުރެވޭނެ އިންތިޒާމް ރާއްވަވައި ބޭހާއި އިންޖިކްޝަނާއި އެކު އާޠިފާއާއި ހަވާލުކޮށްފައި ފަހުން އަންނާނެކަމަށްބުނެ ފުރައިގެން ދިޔައީއެވެ.
މިރޭ ރިޔާޟުގެ ހުން ތަންކޮޅެއް މަޑެވެ. ނަމަވެސް އަދިވެސް އެއްވެސް ކަހަލަ ހޭވެރިކަމެއް ނުލިބެއެވެ. ލޯހުޅުވާލައި ބަލާލުމެއް ނެތެވެ. މިއީ މިގޮތަށް އޭނާ އޮންނަތާ ފަސްވަނަ ރެއެވެ. ގޭތެރެއަށް ވެރިވެފައިވަނީ ހަޤީޤީ ސުކޫތެއް ކަމަށްވިޔަސް ގޭގެ ދެކުނުފަރާތުގައި އަންހެންވެރިންނާއި ފިރެހެންވެރީން އުޅެނީ ވަރަށްވެސް އަވެދިނެތިއެވެ. ބަދިގެ ދޮށުގައިހުރި ޖޯލިތަކާއި ވާދިގު އުނދޯލިތަކުގައި މީހުންތައް ތިއްބެވެ. ޖެހުނު ކޮންމެ ކަމެއް ކޮށްލާދިނުމަށްޓަކައި އައިސްތިބިހާ މީހުންނެވެ. ވާނީވެސް އެހެންނެވެ. ދިއްދޫ ކަތީބު މަނިކުގެ ގެއަކީ ޒަމާނުންސުރެ އެރަށުގެ ޢާމުންގެ ހިތުގައި ޚާއްޞަ ޤަދަރެއް ދެވިފައިވާ ގެއެކެވެ.
މިވަޤުތު ކުރާނެ މާ ޚާއްޞަ ފަރުވާއެއްނެތްކަމުން، އެހެންނަމަވެސް މެންދަމު ބާރައިގެ ހުން ބަލާލުމަށްފަހު އާޠިފާވެސް ދިޔައީ ގޭގެ ދެކުނު ފަރާތަށެވެ. މަޑުމަޑުން އިސްޖަހާލައިގެން ގޮސް އިށީނީ ހިރުދުގަހުގައި އެލުވާފައިހުރި އުނދޯއްޔެއްގައެވެ.
އާޠިފާ އޭނާގެ ހަލާކުވަމުންދާ ހިތުގެ އަޑިގައި އަދާ އަލީފާންގަނޑު ނިއްވާލެވޭތޯ ކުޑަކޮށް ހިތްހަމަޖައްސާލަން އައިކަމަށްވިޔަސް އެ ހިމޭން މެންދަމު އެރީތި ހިރުދުގަސްތަކުން ފުރޭނިގެން ބިމަށް އެޅިފައިވާ ހަނދުވަރުގެ ޖާޒުބީ ތޫނުކަން އަނެއްކާވެސް އޭނާއާއި ކުޅެލައިފިއެވެ. މަޑުމަޑުން ރިޔާޟުގެ ތަޞްވީރު އޭނާގެ ކުރިމަތީގައި އެނބުރޭންފަށައިފިއެވެ. ލޮލުން ފޫދެމުންއައި ކަރުނަތަކެއް އޭނާގެ ކުށެއްނެތް ކޯތާފަތަށް އޮހިގަތުމުގެ އަމުރަށް އެދޭންފަށައިފިއެވެ. (ނުނިމޭ)
Leave a Reply