މާއުނގޫދޫ ފުޓްސަލްދަނޑު ޒަމާނީ ފެންވަރަށް ތަރައްޤީ ކުރުމުގެ އެއްބަސްވުމުގައި މިއަދު ސޮއިކޮށްފިއެވެ.
މާއުނގޫދޫ ފުޓްސަލްދަނޑު ބޮޑުކޮށް ޒަމާނީ ފެންވަރަށް ތަރައްޤީ ކުރުމުގެ މަސައްކަތުގެ އެއްބަސްވުމުގައި ސޮއިކުރުމުގެ ރަސްމިއްޔާތު ކުރިއަށް ގެންގޮސްފައިވަނީ މިއަދު 6 މާރިޗު 2022 ވީ އާދީއްތަ ދުވަހު ހެނދުނު 11:00 ގައި މާއުނގޫދޫ ކައުންސިލްގެ އިދާރާގައެވެ.
މިމަސައްކަތް 1،452،963.15 އަށް ހަވާލުކޮށްފައިވަނީ އެޝުއަރ ސަޕްލައި އާއެވެ. މިމަސައްކަތުގެ އެއްބަސްވުމުގައި އެޝުއަރ ސަޕްލައިގެ ފަރާތުން މިއެއްބަސްވުމުގައި ސޮއިކުރެއްވީ އެކުންފުނީގެ މެނޭޖިން ޑިރެކްޓަރ އިބުރާހިމް ލަތީފްއެވެ. ކައުންސިލުގެ ފަރާތުން ސޮއިކުރެއްވީ ކައުންސިލްގެ ރައީސް އާދަމް ސަލީމް އެވެ. މިމަސައްކަތް ހަވާލު ކުރެވިފައިވަނީ 2 މަސް ދުވަހުގެ ތެރޭގައި ނިންމާގޮތަށެވެ.
ހުށައަޅާ އަންދާސީ ހިސާބުތައް ވަޒަންކުރާނޭ މިންގަނޑާއި ބީލަމާއިއެކު ހުށައަޅަންޖެހޭ ތަކެތީގެ ތަފްޞީލު އަދި ބީއޯކިއު ޓެމްޕްލޭޓް ބީލަމާއި ގުޅޭ މަޢުލޫމާތު ކަރުދާހުގައި ހިމެނިފައިވާނެކަމަށާއި އިތުރު މަޢުލޫމާތު ތިރީގައިވާ އެޑްރެހުން ލިބިވަޑައިގަންނަވާނެކަމަށް ކައުންސިލްގެ ޢިއުލާނުގައިވެއެވެ.
މިދިޔަ ޖަނަވަރީ މަހު މާއުނގޫދޫ އަށް ކުރެއްވި ދަތުރުފުޅުގައި މިނިސްޓަރ އޮފް ޔޫތު ސުޕޯޓްސް އެންޑް ކޮމިއުނިޓީ އެންޕަވަރމަންޓް އަޙްމަދު މަޙްލޫފް ވަނީ މާއުނގޫދޫ ފުޓްސަލްދަނޑު ބޮޑުކޮށް ޒަމާނީ ފެންވަރަށް ތަރައްޤީ ކުރުމުގެ މަސައްކަތް ކައުންސިލުން ޢިއުލާނު ކޮށްގެން ކުރިއަށް ގެންދިއުމަށް ބޭނުންވާ އިންތިޒާމުތަށް ހަމަޖައްސަވައިދެއްވާނެކަމަށް ވިދާޅުވެފައެވެ.
ދަނޑު ތަރައްޤީ ކޮށް ނިމޭއިރު ދަނޑުގެ ސައިޒް ބޮޑުކޮށް ލައިންޓިންގ ސިސްޓަމާއެކު “އޭ” ގުރޭޑް ގެ ޒަމާނީ ފުޓްސަލް ދަނޑަކަށް ވެގެންދާނެއެވެ.
Leave a Reply