ލާމަރުކަޒީ ގާނޫނުގެ 1-107 ގެ (ރ) ގެ ދަށުން ކައުންސިލުން ބޭއްވުމަށް ލާޒިމްކުރާ ރައްޔިތުންގެ ބައްދަލު ވުމުގެ މިދައުރުގެ ދެވަނަ ބައްދަލުވުން 27 ފެބްރުއަރީ 2022 ވީ އާދީއްތަ ދުވަހުގެރޭ ބާއްވައިފި
މިބައްދަލުވުމުގައި މިދިޔަ އަހަރު މާއުނގޫދޫ ކައުންސިލުން ކޮށްފައިވާ މަސައްކަތްތަުކުގެ މައުލޫމާތު ރައްޔިތުންނާއި ހިއްޞާކޮށްފައިވެއެވެ. އަދި މިދިޔަ އަހަރުގެ މާލީ ހިސާބުތައް ވެސް ހިއްސާކޮށްފައިވެއެެވެ.
މިބައްދަލުވުމުގައި މިއަހަރު ކައުންސިލުން ކުރަމުންދާ ބައެއް މަސައްކަތްތަކާއި ގުޅޭ ގޮތުންވެސް މަޢުލޫމާތު ހިއްޞާކޮށްފައިވެއެވެ. އެގޮތުން ފާހަގަކޮށްލެވޭ ބައެއް ކަންކަމުގެ ތެރޭގައި
- ރަށްވެހިންގެ ހިޔާ އެއް އެޅުމަށް ބޭނުންވާ އެންމެހައި ކުރެހުންތަކާއި ބީއޯކިއު ތައްޔާރުކޮށް ނިމިފައިވާ ކަމަށާއި ކޮންޓުރެކްޓަށް ވަރަށް އަވަހަށް ހުޅުވާލެވޭނެކަމަށް ފާހަގަ ކުރެއްވިއެވެ.
- ފުޓްސަލް ދަނޑު ބޮޑުކޮށް ޒަމާނީ ފެންވަރަށް ތަރައްޤީ ކުރުމަށް ކައުންސިލުން ކުރަމުންދާ މަސައްކަތުގެ ދަށުން އެމަސައްކަތް ބަޔަކާއި ހަވާލު ކުރެވި މަސައްކަތް ފެށުމަށް ތައްޔާރު ވަމުންދާކަން ހާމަކުރިއެވެ.
ސަރުކާރުން މާއުނގޫދޫގައި ހެދުމަށް ބަޖެޓް ކޮށްފައި ފަޅުގެ ޑިޒައިން ރައްޔިތުންނާއި ހިއްޞާކުރުންވެސް ރޭގެ ބައްދަލުވުމުގައި ކުރިއަށް ގެންގޮސްފައި ވެއެވެ. މިނިސްޓްރީ އިން މިހާރު ފަޅު ހެދުމަށް ފޮނުވާފައިވާ ކުރެހުން ކައުންސިލުން ބަލައިގަންނަން ބޭނުންނުވާ ކަމަށް ކައުންސިލުން ވަނީ ހާމަކޮށް ފައެވެ.
ކައުންސިލުން ބޭނުންވަނީ ފަޅުގެ ފުޅާމިނުގައި 250 ފޫޓް ހުންނަ ވަރުގެ ބަނދަރެއް ހެދުމަށެވެ. މިދިޔަ އަހަރު މިނިސްޓްރީ އޮފް ޕުލޭނިންގ ހައުސިން އެންޑް އިންފުރާސުޓުރަކްޗަރ އެކު ކުރިއަށް ގެންދެވުނު ބައްދަލުވުމުގައި ވެސް އެއްބަސްވެވިފައި ވަނީ އެވަރުގެ ބަނދަރެއް ހެދުމަށް ކަމަށް ކައުންސިލުން ފާހަގަކުރެއެވެ. ނަމަވެސް މިނިސްޓްރީގެ ބޭފުޅުން ފޮނުވި ކުރެހުމުން ފަޅުގެ ފުޅާމިނަށް ލިބޭނެކަމަށް ދައްކަނީ 190 ފޫޓް ކަމަށްވެސް ހާމަކުރެއްވިއެވެ.
އެހެންކަމުން ކައުންސިލުން ބޭނުންވަނީ މިހާރުގެ ބަނދަރުގެ ހުޅަނގުން އޮތް ތަނުގައި ބޭރުން ޖާގަ ލިބޭ ސަރަހައްދަކަށް ބަނދަރު ބަދަލު ކުރުމަށެވެ.
ރޭގެ ބައްދަލުވުމުގައި ބައިވެރިވި ހުރިހާ ފަރާތްތަކުން ވެސް ބޭނުންވަނީ ކައުންސިލުން ވެސް ބޭނުންވާ ގޮތަށް 250 ފޫޓްގެ ފުޅާމިން ލިބޭ ސަރަހައްދަކަށް ބަނދަރު ބަދަލު ކުރުމަށެވެ. ރޭގެ ބައްދަލުވުމުގައި ގިނަ އަދަދެއްގެ މަސްވެރިން ވެސް ބައިވެރިވިކަން ފާހަގަކުރެވެއެވެ.
ރޭގެ ބައްދަލުވުމުގައި ފުރަތަމަ ފަހަރަށް މާއުނގޫދޫ ކައުންސިލްގެ ރަސްމީ ވެބްސައިޓް ވެސް ވަނީ އިފްތިތާހު ކޮށްފައެވެ. މިއީ ކައުންސިލްގެ 3 ދައުރު ވޭތުވެގެން ދިޔައިރު ވެސް ނުކުރެވި އޮތް ކުޑަކުޑަ ކަމެކެވެ. މިއީ ޒަމާނީ ވިސްނުމަކުން ކައުންސިލުން ވެސް ވިސްނަންފެށިކަން ހާމަކޮށްދޭ ހެއްކެކެވެ.
4 ވަނަ ދައުރުގެ ކައުންސިލް ހުވާކުރުމަށްފަހު ގާނޫނުގައި ލާޒިމްކުރާ ގޮތަށް ގަވާއިދުން ރައްޔިތުންގެ ބައްދަލުވުންތައް ބާއްވަމުން ދާކަން ފާހަގަ ކޮށްލެވެއެވެ.
Leave a Reply