ސަރުކާރުން މާއުނގޫދޫގައި ތަރައްޤީކުރުމަށް ހަމަޖެހިފައިވާ ބަނދަރުގެ ފައިނަލް ސަރވޭ ފަށައިފި
ބަނދަރުގެ ސަރވޭ ފެށުމަށް އެމް. ޓީ. ސީ. ސީ ގެ ސަރވޭ ޓީމް މިއަދު މެންދުރު ފަހު މާއުނގޫދޫ އަށް އައިސް ވަނީ މަސައްކަތް ފަށާފައެވެ.
މިދިއަ ޑިސެމްބަރ ތެރޭގައި ކުރި ސަރވޭ އަށް ފަހު މިމަހުގެ ތެރޭގައި ފަޅުގެ ޑިޒައިން ވަނީ ފޮނުވާފައެވެ. ނަމަވެސް އެ ޑިޒައިން އަށް ރަށްޔިތުންގެ ހިޔާލު ހޯދުމަށް ފެބްރުއަރީ 27 ވަނަ ދުވަހު ބޭއްވުނު ރައްޔިތުންގެ ބައްދަލުވުމަށް ހުށައެޅުން އޭރު ފޮނުވާފައި އޮތް ކުރެހުމާއި އެއްގޮތަށް ފަޅު ހެދުމަށް ރައްޔިތުންވަނީ ދެކޮޅު ހަދާފައެވެ.
ކައުންސިލުން މިކަމުގައި މިނިސްޓްރީ އޮފް ޕުލޭނިންގ ހައުސިން އެންޑް އިންފުރާސުޓުރަކްޗާރ އާއި މަޝްވަރާކުރުމުން ރައްޔިތުން ބޭނުންވާ ގޮތަށް ފަޅުގެ ޑިޒައިން ހިއްސާ ކުރުމަށް އެންގުމުން ހުޅަނގު ދެކުނު ކޮޅުގައި ފަޅު ބޭއްވުމަށް ނިންމައި މާރިޗް 2 ވަނަ ދުވަހު ކައުންސިލުން ރައްޔިތުން ބޭނުންވާ ގޮތަށް ކުރެހުން ހިއްސާ ކުރެއްވިއެވެ.
ރައްޔިތުން ހުޅަނގު ދެކުނު ފަރާތުގައި ފަޅު ބޭއްވުމަށް ބޭނުންވާ އެންމެ ބޮޑު ސަބަބެއް ކަމަށް ފާހަގަ ކުރަނީ އެސަރަހައްދަކީ މިރަށުގެ ބޭރުމަތިން އެންމެ ޖާގަ ތަނަވަސް ފަރާތަކީ އެއީ ކަމަށް ވާތީއެވެ. އަދި އެހެން ސަރަހައްދެއްގައި ފަޅު ހަދައިފިނަމަ ފަޅުގެ ފުޅާމިނަށް ރައްޔިތުން ބޭނުންވާ ގޮތަށް 250 ފޫޓް ލިބެން ނެތުމުން ނެވެ.
މިނިސްޓްރީ އޮފް ޕުލޭނިންގ ހައުސިން އެންޑް އިންފުރާސުޓުރަކްޗާރ އިން ފޮނުވި ކުރެހުމުގައި ފަޅުގެ ފުޅާމިނަށް ރަށުން ބައެއް ކަނޑައިގެން ވެސް ލިބެންއަންނަނީ 190 ފޫޓްއެވެ. މި މިނަކީ ރައްޔިތުން ބޭނުންވާ ވަރަށް ވުރެ ކުޑަމިންވަރެކެވެ. ވުމާއެކު ރައްޔިތުންގެ ވިސްނުމަކީ މިހާރު ދިމާވެފައިވާ ލަފާފުރުމުގެ މައްސަލަ އަށް ދާއިމީ ހައްލެއް ލިބިގެން ދާނެ ފަދަ ގޮތަކަށް މިފަހަރުގެ ބަނދަރު ހެދުމުގެ މަސައްކަތް ނިމިގެން ދިއުމެވެ.
Leave a Reply