ށ އަތޮޅު ފެރީ ގެ ހިދުމަތް މިހާރަށްވުރެ ހަރުދަނާ ކުރުމާއި ބެހޭގޮތުން ށ އަތޮޅު ކައުންސިލުން އެމްޓީސީސީއާއެކު މަޝްވަރާ ބައްދަލުވުމެއް ބާއްވަން ނިންމަވައިފިއެވެ.
ށ އަތޮޅު ކައުންސިލްގެ ރައީސް މުޙައްމަދު ޝިޔާމް (ޝިޔާންޓޭ) ވިދާޅުވީ ށ އަތޮޅު ފެރީގެ ޚިދުމަތް މިހާރަށްވުރެ ހަރުދަނާކޮށް ރައްޔިތުންގެ ހުރިކަންބޮޑުވުންތައް ބަލައި އެކަންކަން ހައްލުކުރުމަށްޓަކައި އެމްޓީސީސީގެ ޓީމަކާއި ކައުންސިލުން މާދަމާ ބައްދަލުވުމެއް ބޭއްވުމަށް ހަމަޖެހިފައިވާކަމަށެވެ. އަތޮޅު ކައުންސިލްގެ ރައީސް އިތުރަށް ވިދާޅުވީ މިހާރުވެސް ރައްޔިތުން ބޭނުންވާ ބަދަލު ގެނެސްދެއްވާނެ ކަމުގެ ޔަގީންކަން އެމްޓީސީސީގެ ފަރާތުން ދެއްވާފައިވާ ކަމަށެވެ.
މީގެ އިތުރުން ފެރީތައް ލަފާ ފުރުމުގައި ހުރި ދަތިތައް ދެނެގަތުމައްޓަކައި ށ އަތޮޅުގެ 4 ރަށަކަށް އެމްޓީސީސީގެ ޓީމުން ޒިޔާރަތް ކުރުމަށް ވެސް ހަމަޖެހިފައިވާ ކަމަށް އަތޮޅު ކައުންސިލްގެ ރައީސް ވިދާޅުވިއެވެ. އެގޮތުން ފުނަދުއަށާއި، ފޯކައިދުއަށާއި، ނަރުދުއަށް އަދި ފޭދުއަށް އެމްޓީސީސީގެ ޓީމުން ދާނެއެވެ.
ށ އަތޮޅު ގައި އެމްޓީސީސީން ދެމުންގެންދާ ފެރީގެ ހިދުމަތަކީ ގިނަ އަދަދެއް ރައްޔިތުން ބޭނުން ކުރަމުން އަންނަ ހިދުމަތެކެވެ. ޞިއްޙީ ޚިދުމަތް ހޯދުމަށާއި ވިޔަފާރީގެ އެކި ބޭނުންތަކަށް ފެރީގެ ހިދުމަތް ހޯދާ ގިނަބަޔަކު އުޅެއެވެ. ނަަމަވެސް ޝެޑިއުލްއާއި އެއްގޮތަށް ދަތުރުތައް ކުރިއަށް ނުދިއުމާއި އާންމުކޮށް ފެރީ ކެންސަލްވުމާއި ކެންސަލްވާ ދަތުރު ނުކުރެވުމަކީ ރައްޔިތުންނަށް އޭގެސަބަބުން ވަރަށް ގިނަ ތަކުލީފު ތަކަކާއި ކުރިމަތިލާންޖެހޭ ކަމަކަށްވެ ރައްޔިތުންގެ ޝަކުވާ ވަނީ ނިހާޔަތަށް ގޮސްފައެވެ.
ށ އަތޮޅު ގެ ރައްޔިތުން ގެ އެންމެ ބޮޑު ޝަކުވާ އަކަށް ވެފައިވަނީ ބައެއް ރޫޓް ތަކުގެ ފެރީތައް އާންމުކޮށް ކެންސަލްވަމުން ދިއުމާއި ބައެއް ރޫޓް ތަކުގެ ދަތުރުތައް ކުއްލިއަކަށް ފެރީ އަށް މައްސަލައެއް ޖެހިގެން ކަމަށް ބުނެ ކެންސަލްވެގެން ދާދިއުމެވެ. ފެރީ ނިޒާމްގެ ހިދުމަތް ބޭނުން ކުރަމުންދާ ބައެއް ފަރާތްތަކުން ހާމަކުރާ ގޮތުގައި ކުޅުދުއްފުށި މާއުނގޫދޫ ރޫޓްގެ ދަތުރުތައް ވަރަށް ގިނައިން ކެންސަލްވާ ކަމަށާއި މިފަހަކަށް އައިސް މަހަކު ދަތުރެއް ވެސް ނުކުރެވޭކަމަށެވެ.
އެޑްމިން