ކޮވިޑް-19 ގެ ވެކްސިންގެ ބޫސްޓަރ ޑޯޒް ޖެހުމަށް ބޭނުންވާ ފަރާތްތަކުން ނަންނޯޓްކުރުމަށް މިއަދު ހުޅުވާލައިފި އެވެ.
މި ބޫސްޓަރ ޑޯޒް ދިނުމަށް ނިންމާފައި ވަނީ އުމުރުން 50 އަހަރުން މަތީގެ މީހުންގެ ތެރެއިން ކޮވިޑް-19 ގެ ވެކްސިންގެ ދެ ޑޯޒް ފުރިހަމަކޮށް 6 މަސްދުވަސް ވެފައިވާ ފަރާތްތަކަށެވެ. މިވަގުތު ވެކްސިންގެ އިތުރު ޑޯޒްގެ ގޮތުގައި ޖެހުމަށް ހަމަޖެހިފައިވަނީ ފައިޒަރ ވެކްސިނެވެ.
ބޫސްޓަރ ޑޯޒް ޖެހުމަށް ބޭނުންވާ ފަރާތްތަކުން ނަންނޯޓްކުރުމަށް މިލިންކުގައިވާ ގޫލް ފޯމް ވީހާވެސް އަވަހަކަށް ފުރުއްވުމަށާއި ބޫސްޓަރ ޑޯޒް ޖެހުމަށް ވެކްސިން ފޮނުވާނީ މި ލިސްޓް އަށް ބަލައިގެން ކަމުގައިވާތީ މިކަމަށް ޙާއްސަ ސަމާލުކަމެއް ދެއްވުމަށް މާއުނގޫދޫ ޞިއްޙީމަރުކަޒުން އެދިލައްވައެވެ.
މިވަގުތު ކޮވިޑް ވެކްސިންގެ އިތުރު ޑޯޒް ޖެހުމަށް ހަމަޖެހިފައިވަނީ އުމުރުން 50 އަހަރުން މަތީގެ މީހުންނާއި ދިފާޢީ ނިޒާމު ބަލިކަށި މީހުންނަށް ކަމަށް އެޗްޕީއޭ އިން ވަނީ މީގެ ކުރިން ހާމަކޮށް ފައެވެ. އެޗްޕީއޭ އިން ހާމަކުރައްވާފައިވާ ގޮތުގައި ހަށިގަނޑުގެ ގުނަވަނެއް ބަދަލުކޮށްފައިވާ މީހުންނާއި, އިމިއުނޯސަޕްރެންޓް ނުވަތަ ހަށިގަނޑުގެ ދީފާޢީ ބާރު ދެރަކުރާފަދަ ބޭސްތައް ބޭނުންކުރާ މީހުންނާއި, ދިގުމުއްދަތަކަށް ސްޓެރޮއިޑްގެ ބާވަތްތައް ބޭނުންކުރާ މީހުންނާއި, ގަވާއިދުން ޑަޔަލިސިސް ހަދަމުންދާ މީހުން ވެސް ދިފާޢީ ނިޒާމު ބަލިކަށި މީހުންގެ ތެރޭގައި ހިމެނޭ ކަމަށް ވަނީ ބުނެފައެވެ.
މީގެއިތުރުން ކެންސަރު ބަލީގެ ފަރުވާ ހޯދަމުންދާ މީހުންނާއި, ބައްޔަށް ފަރުވާކޮށް ނިމި އަހަރެއް ނުވާ މީހުންނާއި އިސްކޮޅާ އަޅާ ބަލާއިރު ބަރުދަން މަތި މީހުންނާއި ފުއްޕާމޭގެ ބަޔެއްގެ ސަބަބުން ގޭގައި އޮކްސިޖަންގެ ތެރަޕީގެ ފަރުވާ ލިބޭ މީހުންނާއި އެ ފަރުވާއަށް ޑޮކްޓަރު އިރުޝާދު ދީފައިވަނީ މީހުންގެ އިތުރުން ފުއްޕާމޭގެ ބައްޔަށް ފަރުވާކުރާ މީހުންނާއި ފަރުވާދިފައިވާ މީހުން ދިފާޢީ ނިޒާމު ބަލިކަށި މީހުންގެ ތެރޭގައި ހިމެނޭ ކަމަށް ވަނީ ހާމަކޮށް ފައެވެ.
Leave a Reply