މާއުނގޫދޫ އަށް އެންމެ ބޭނުންވަނީ ކޮންކަމެއްތޯ އަހައިފިނަމަ ލިސްޓުގެ އެންމެ ކުރީގައި އުޅޭނީ ބަނދަރުގެ ވާހަކައެވެ.
ރާއްޖޭގެ ރަށްތައް އުފެދިފައިވާ ގޮތުން ބައެއް ރަށްރަށް ގުދުރަތުން ދެއްވާފައިވަނީ މީހުންގެ ހިތްތައް ދަމައިގަންނަ ފަދަ ރީތި ފަޅުތަކަކާއި ގޮނޑުދޮށް ތަކެވެ. އެހެންނަމަވެސް އަނެއް ބައި ރަށްރަށަށް މިނަސީބެއް ނެތެވެ. އެގޮތުން މާއުނގޫދޫ އަކީ ވެސް އެ ނަސީބުލިބިފައިނުވާ ޒަމާނުންސުރެ ލަފާ ފުރަން ދަތި ރަށެކެވެ.
ރަށްރަށަށް އަރާ ފޭބުމުގައި ތަހައްމަލު ކުރަމުންދިޔަ ވޭންދެނެވި އުނދަގޫކަމަށް ނިމުމެއް ލިބިގެންދިޔައީ މައުމޫން ދައުރުގެ ފަހުކޮޅު ހައްދަވައިދެއްވި ބަނދަރުންނެވެ. ބަނދަރާއެކު ރަށްރަށަށް އަރާ ފޭބުމަށް ފަސޭހަވެގެން ދިޔައެވެ. ނަމަވެސް އޭރުގެ ސަރުކާރުން ހަދައިދިން ބަނދަރު ހެދިފައިވަނީ އެންމެ އެކަށީގެންވާ ގޮތެއްގައެއްނޫނެވެ. އޭގެ ސަބަބުން އެތައްފަހަރަކު ފަޅުތެރެއަށް ވެލި ވަދެ ވަނީ ހިކިފައެވެ. އެކަން ޙައްލުކުރުމަށް އެތައްފަހަރަކު ވަނީ ވެލިގަނޑު ނަގައި ފުންކުރެވިފައެވެ. އެހެންނަސް އެކަމަށް އަދާޖެހެންދެއްވެސް ދާއިމީ ހައްލެއްވަނީ ނުލިބި ފައެވެ.
ގިނަ ރަށްރަށުގައި ބަނދަރު ހަދަނީ އެރަށެއްގެ ރައްޔިތުން ބޭނުންވާތާކުއެވެ. ބަނދަރު ހެދުމަށް އެންމެ ރަނގަޅު ތަނެއް ކަމާ ބެހޭ މާހިރުން ދިރާސާކުރުމަށްފަހު ދެއްކި ނަމަވެސް ރަށުގެ ރައްޔިތުން އެއްބަސްނުވާތާކު ބަނދަރެއް ނެހެދޭނެއެވެ. ކަންވާނީވެސް އެހެންތާއެވެ. އެއީ އެމީހުން ދިރިއުޅޭ ރަށެވެ. ބަނދަރު އޮންނަންވީ ތަނާއި ބޮޑު މިނާއި އޮންނަންވީ ސިފަ އެނގޭނީ ރަށުގައި އުޅޭ މީހުންނަކަށް ނޫންހެއްޔެވެ؟ މާދުރުން އަންނަ ބަޔަކަށް އެނގޭނީ ކޯއްޗެއް ހެއްޔެވެ؟ މާއުނގޫދޫ ގައި މިހާރު ކޮނެވިފައިވާ ބަނދަރަކީވެސް އޭރުގެ ސަރުކާރުން ބޭނުންވި ތަނުގައި ކޮނެވިފައިވާ ބަނދަރެއް ނޫނެވެ.
ރައްޔިތުން ގަދަ ދައްކާލުމުން ސަރުކާރަށް މަޖުބޫރުވީ ހަތިޔާރު ބަހައްޓާށެވެ. އެއީ އާޚިރުގައި އަނެއްކާވެސް ދާން އޮތީ ހަމަ އެއް ކަލަ ރައްޔިތުން ކައިރިއަށް ކަމުންނެވެ. އެހެންކަމުން ރައްޔިތުން ހިތްހަމަ ޖައްސާލަދޭން އެބަޖެހެއެވެ.
އެހެންނަމަވެސް ދެން ލައްވާލަނީ މާބޮޑު ހައްލުކުރަން އުނދަގޫ މައްސަލައެކެވެ. ބަލަބަލާ ތިއްބާ އެތައް ސަތޭކަ އަހަރެއްވީ ބޮޑެތި ގަސް ގަހާ ގެހި އެހެރަ މޫދަށް ފައިބައިގެން ދަނީއެވެ. ކުޑައިރުގެ އެތައް ހަނދާންތަކެއް ކަނޑަށް ޣަރަގުވެގެންދަނީ ލޯ ކުރިމަތީގައި ބަލަހައްޓައިގެން ތިއްބައެވެ. ކުރެވޭނެ މާބޮޑު ކަމެއް ނޯވެއެވެ. ވެލި ގޯނިތަކެއް ޖައްސައިގެން ނުވަތަ ބޮޑެތި ހިލަތައް ޖައްސައިގެން ފުއްދާލަނީއެވެ. ކުރާނީ ކީއްހެއްޔެވެ؟ ރީތި ގޮނޑުދޮށް ރަށާ އުމުރު ދުވަހަށް ވަކިވީއެވެ. ދެން ދުވަހަކުވެސް ގުދުރަތީ އެރީތިކަމުގައި ހޯދޭނެ އުފަލެއް ނޯންނާނެއެވެ. ދަރިންނާއި ދަރިންގެ ދަރިން ކައިރީގައި ދެން އެވާހަކަ ދައްކާލާ މާޒީއަށް ހަދާފައި ދޫކޮށްލާނީއެވެ.
ނިމިދިޔަ ދައުރުގެ ފަހުކޮޅުގައިވެސް މާއުނގޫދޫގެ ބަނދަރުގެ މަރާމާތުގެ މަސައްކަތް ސަރުކާރުން އެމް. ޓީ. ސީ. ސީ އާއި ހަވާލުކޮށްގެންވަނީ ކޮށްފައެވެ. އެމަސައްކަތުގައި ގާތްގަނޑަކަށް 2 އަހަރު ދުވަސް ވަންދެން ހޭދަވެގެން ދިޔައެވެ. ނަމަވެސް އެންމެ ހުޅަނގެއް ނިމިގެން ދިޔައިރު ބޭރު ތޮށި ރޫޅި، ދެކުނުކޮޅުން ތޮށި ނުލައި ހަދާފައި އޮތް ވެލި ބެޑު ގިރާލައި އެއްވެސް ހުރަހެއް ނެތި ރާޅުތައް ފަޅު ތެރެއަށް މުގުރަންފެށިއެވެ. އޮޑިވެރިންނަށް ނުނިދާ ދަމަށް ތިބުންނޫން ގޮތެއް ނެތެވެ.
2021 ވަނަ އަހަރުގެ ބަޖެޓް ގައި ވެސް މާއުނގޫދޫ ގައި އަލުން ބަނދަރެއް ތަރައްޤީކުރުމަށް ވަނީ ހިމަނާފައެވެ. ނަމަވެސް އަދި އެކަމުގެ އެއްވެސް ހިލަމެއް ނުވެއެވެ. ބަނދަރު ހެދީންސުރެ އޮޑިވެރިންނާއި، ފަޅުގެ ބޭނުން ހިފާ ރައްޔިތުންނަށް އެއްވެސް ހަމަޖެހުމެއް މިއަދާ ހަމައަށް ލިބިފައެއް ނުވެއެވެ. އެހެންކަމުން އަދިވެސް މާއުނގޫދޫގެ ރައްޔިތުން އިންތިޒާރު ކޮށްގެން ތިބީ ޒަމާނާ އެއްގޮތަށް ތަރައްގީކޮށްފައިވާ ރީތި ބޮޑު ބަނދަރެކެވެ.
Leave a Reply