ށ. މާއުނގޫދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ފަރާތުން ކުރިއަށްގެންދިޔަ ފެހުމުގެ އެޑުވާންސް ކޯސްނިންމާ ބައިވެރިންގެ މަސައްކަތްތައް ދައްކާލުމަށް ނިންމައިފިއެވެ.
އެގޮތުން މިއަދު ހަވީރު 4:00 އިން 6:00 ދެމެދު ކޯހުގެ ބައިވެރިން ކޮށްފައިވާ މަސައްކަތްތައް ދައްކާލުން މާއުނގޫދޫ ޕުރީސުކޫލް ކުރިން ހިންގި އިމާރާތުގައި އޮންނާނެ ކަމަށް މައުލޫމާތު ލިބެއެވެ. އަދި އެތަކެތި ބައްލަވާލެއްވުމަށް ބޭނުންވާ އެންމެ ފަރާތްތަކަށް އެ ފުރުޞަތު ހުޅުވިފައި ވާ ކަމަށް އެކޮމެޓީން ހާމަކުރެއެވެ.
ފެހުމުގެ އެޑުވާންސް ކޯހަކީ މިދިޔަ އޮކްޓޫބަރު މަހު 15 އިން ފެށިގެން 25 ދުވަހުގެ މުއްދަތަށް ހިންގުން ކޯހެކެވެ. މިކޯހުގައި ކިޔަވައިދީފަވަނީ މިދާއިރާގެ ތަޖުރިބާކާރު ފެހުންތެރިއެކެވެ. މިކޯހުގައި ޖުމްލަ 30 ބައިވެރިން ބައިވެރި ވެފައިވެއެވެ. މިކޯހާއި ގުޅޭގޮތުން ކޯހުގެ ބައިވެރިން ހާމަކުރާ ގޮތުގައި މިއީ ފެންވަރު ވަރަށް ރަނގަޅު ކޯހެކެވެ.
މާއުނގޫދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ފަރާތުން މީގެ ކުރިންވެސް ވަނީ ގިނަ ހަރަކާތްތަކެއް އެރަށުގައި ހިންގާފައެވެ. އެގޮތުން، އެރަށު ގޮނޑުދޮށް ސާފުކުރުމާއި ނިމިދިޔަ އަޟްހާ އީދުގައި އެރަށުގައި ދިރިއުޅޭ ކުޑަކުދިންނަށް އެ ކޮމިޓީގެ ފަރާތުން އީދު ހަދިޔާ ބެހުމުގެ އިތުރުން 8 އަހަރުން މަތީގެ ފަރާތްތަކަށް އަމާޒުކޮށްގެން އެރަށުގައި ނަމާދު ކުރަން ދަސްކޮށްދޭ ކްލާހެއް ބޭއްވުން ފާަހަގަކޮށްލެވެ އެވެ.
Leave a Reply