މާއުނގޫދޫގެ ޒުވާން ވިޔަފާރިވެރިއެއް ކަމުގައިވާ ލުނބޯމާ އިއްސެ ތަރައްޤީކުރި ”ކަނބުލޮ އަތިރި“ ހުޅުވައިފި
ރަށުގެ ހުޅަނގު ކޮޅުގައި ތަރައްޤީ ކުރި ބީޗަކީ ރައްޔިތުންގެ ހިތް ހަމަޖެހުމަށާއި ހިތް ފަސޭހައަށް ތަރައްޤީކުރި ތަނެއް ކަމަށް ބީޗުތަރައްޤީކުރުމުގައި ހަރަކާތްތެރިވި އިއްސެ މައުލޫމާތުދިނެއެވެ.
”ކަނބުލޮ އަތިރި“ ހުޅުވުމަށް މިއަދު ހެނދު ބޭއްވުނު ކުޑަރަސްމިއްޔާތެއްގައި މާއުނގޫދޫގެ ކައުންސިލް މެންބަރުންވެސް ބައިވެރިވިއެވެ. މި އަތިރި ހުޅުއްވައި ދެއްވީ މާއުނގޫދޫ ކައުންސިލްގެ އަންހެނުންގެ ޚާއްޞަ މެމްބަރ އާސިމާ އާދަމްއެވެ.
މިބީޗުގައި ބާބަކިޔު ހެދުމަށް ޙާއްސަ ބާބަކިއު އޭރިއާއަކާއި، އިށީންދެވޭގޮތައް ތައްޔާރުކޮށްފައިވާ ތަފާތު ގޮނޑިތައްވެސް ހިމެނެއެވެ. ބީޗުގެ އެކިސަރަހައްދު ތަކުގައި ތިމާވެއްޓަށް ގެއްލުންހުރި ކަންކަމަށް މީހުން ހޭލުންތެރިކުރުވުމަށް ބޯޑްތައް ހަރުކޮށްފައިވާކަން ވެސް ފާހަގަކުރެވެއެވެ. އަދި ބީޗު ސަރަޙައްދު ސާފުކޮށް ބޭއްވުމަށްޓަކައި ޑަސްބިންތައްވެސް ބަހައްޓާފައިވާކަން ފާހަގަކުރެވެއެވެ. ލުނބޯމާ އިއްސެ އިތުރަށް ފާހަގަކުރެއްވި ގޮތުގައި ”ކަނބުލޮ އަތިރި“ ގެ މަސައްކަތް އަދިވެސް އޮތީ ކުރިއަށެވެ. ރަނގަޅު ފެންވަރެއްގައި މިހާރަށްވުރެވެސް ބޮޑަށް މިއަތިރި ތަރައްޤީ ކުރުމުގެ ވިސްނުން އޭނާގެ އެބަހުއްޓެވެ.
އިއްސެ ފާހަގަވެފައިވަނީ ތިމާވެށިގެ އެކި މަސައްކަތްތަކުގައި ހީވާގިކަމާއެކު މަސައްކަތްކުރާ ޒުވާނެއްގެ ގޮތުގައެވެ. ރަށުގައި ޗުއްޓީ ހޭދަކުރުމަށް އަންނަ ކޮންމެފަހަރަކުވެސް ރަށުގެ ގޮނޑުދޮށުން ޕުލާސްޓިކް ހޮވުމާއި، ފަޅުތެރެ ސާފުކުރުމާއި، ކަނޑޫފާ ސަރަހައްދު ސާފުކުރުންފަދަ މަސައްކަތްތައް ކޮށްފައިވާކަން މާއުނގޫދޫ.ކޮމް ގެ ޓީމަށްވަނީ ފާހަގަކުރެވިފައެވެ.
Leave a Reply