ކައުންސިލުން ހިލޭ ފޯރުކޮށްދިނުމަށް ނިންމާފައިވާ ނާސަރީ އަދި ބޭބީނާސަރީ ކުލާސްތައް ފެށުން 15 އޯގަސްޓު 2021 ހަމަޖައްސައިފިއެވެ.
މާއުނގޫދޫ ކައުންސިލުން ހިންގާ ޕުރީސުކޫލް ކުލާސްތައް ހިންގުމަށް ހަމަޖެހިފައިވަނީ މިނިސްޓްރީ އޮފް އެޑިއުކޭޝަނުގެ ހުއްދައާއި އެކު މާއުނގޫދޫ ސުކޫލްގައެވެ. ކުލާސްތައް ކުރިއަށް ގެންދިއުމަށް ކައުންސިލުން ރާވާފައި ވަނީ މެންދުރު ފަހުގެ ވަގުތު ތަކުގައިއެވެ. ކުލާސްތަކުގައި ކިޔަވައިދިނުމަށް ބޭނުންވާ މުދައްރިސުން މިހާރު ހޯދައި ނިމިފައިވާ ކަމަށާއި 13 އޯގަސްޓު 2021 ދުވަހު ހަވީރު 4:30 ގައި ޔުނީފޯމާއި ފޮތްބައި ހަވާލުކުރުން ކައުންސިލް އިދާރާގައި އޮންނާނެކަމަށް ކައުންސިލް އިދާރާއިން ހާމަކުރައްވައެވެ.
ބޭބީނާސަރީއާއި، ނާސަރީ ހިލޭކުރުމަކީ މިދިއަ ކައުންސިލް އިންތިޙާބުގައި އެމް.ޑީ.ޕީގެ ޓިކެޓްގައި ވާދަކުރެއްވި ކޭޑިޑޭޓުންގެ މެނިފެސްޓޯގައި ހިމެނިފައިވާ ވަޢުދެކެވެ. މާއުނގޫދޫ ކައުންސިލަކީ އެމް.ޑީ.ޕީ މެޖޯރިޓީ ކައުންސިލެކެވެ. މީގެ ކުރީގައިވެސް މާއުނގޫދޫގައި ނާސަރީއާއި ބޭބީނާސަރީގެ ޙިދުމަތް ދެމުންގޮސްފައިވެއެވެ. ނަމަވެސް އޭރު އެކަން ކުރަމުން ގޮސްފައިވަނީ ކުދިންގެ އަތުން ފީނަގައިގެންނެވެ. މިފަހަރު ޕުރީސުކޫލްގައި ކިޔަވާ ކޮންމެ ދަރިވަރަކަށް ޔުނީފޯމާއި ފޮތްލިސްޓު ކައުންސިލުން ހިލޭ ދިނުމަށްނިންމާފައިވާކަން ފާހަގަކުރެވެއެވެ.
Leave a Reply