ނުވަދިހައިގެ ކުރީކޮޅު މާއުނގޫދޫގެ ނަން އެންމެ ބޮޑަށް ރާއްޖޭގައި މަސްހޫރުވެފައިވަނީ ވޮލީ ބޯޅަ ކުޅުމަށް ނަންވިދާލި ޒުވާނުންތަކަކާއި އެކު ވޮލީ ބޯޅަ ކުރިއެރުވުމަށް މަރުދިން ރައްޔިތުންތަކެއް ދިރި އުޅުނު ރަށެއްގެ ގޮތުގައެވެ.
ޔޫތުކަޕާއި، އަތޮޅު ވޮލީމުބާރާތް، ޒޯން އަދި ޤައުމީ މުބާރާތް ފަދަ އެތަށް މުބާރާތެއްގައި ވާދަކޮށް އަތޮޅާއި ޤައުމީ ފެންވަރުގައި އެތަކެއް ކާމިޔާބީ ތަކެއް ވަނީ އެޒުވާނުން އެދުވަހު ރަށަށް ހޯދައިދީފައެވެ. ނަމަވެސް ގިނަދުވަސްތަކަކަށް ދެމިގެންދާ އާކުޅުންތެރިން އުފެއްދުމުގެ މަސައްކަތްތަކެއް ކުރެވެމުން ނުދެވުމުގެ ނަތީޖާއަކަށްވެގެން ދިޔައީ އެދުވަހުގެ ޖީލު އަތުން މިއަދުގެ ޖީލާއި ހަމައަށް ވޮލީގެ މަތީ ހުނަރުވެރިން ރަށުން އުފެދެމުން ނުދިއުމެވެ.
އެދުވަހު ރަށުގެ ވޮލީޓީމަށް ކުޅުމަށް ރާއްޖޭގެ އެންމެ މަތީ ވޮލީގެ ތަރިންނާއި މަސްހޫރު ވޮލީ ކޯޗުން ރަށުޓީމަށް ގެނެސް ހިންގުނު ޓްރައިނިންގތަކާއި ރަށުގެ ޒުވާނުން އަތޮޅާއި ޤައުމީ ފެންވަރުގައި ފާހަގަވެގެން ދިއުމުގެ ނަތީޖާއަކީ މާލޭގައި ބޭއްވޭ ބޮޑެތި މުބާރާތްތަކާއި، ރިސޯރޓްސް ވޮލީ މުބާރާތުގައިތަކުގައި އެކި ޓީމްތަކަށް މިރަށަށް ނިސްބަތްވާ ގިނަ ކުޅުންތެރިންތަކެއް ފެނިގެންދިއުމެވެ.
ނުވަދިހައިގެ ފަހުކޮޅު ވޮލީގެ މައްޗަށް ފުޓްބޯޅައިގެ ފޯރި ގަދަވެގެން ދިއުމުގެ ސަބަބުން ވޮލީގެ ފޯރި ކުޑަވެ އެއްކޮށް ވަޅުޖަހައިގެންދިޔައެވެ. ވޮލީކުޅެން ބޭނުންކުރަމުންދިޔަ ކޯޓު ހަލާކޮށްލާ އެތަނުގައި ފުޓްސަލް ދަނޑު ހެދިއެވެ. ދެން ދުވަހަކުވެސް ވޮލީގެ ފޯރި އާލާކުރެވިދާނެ ކަމުގެ ކޮޅުމަތި ފެންނަން ނެތުމުންނެވެ.
ނަމަވެސް ކަންވެގެންދިޔައީ މުޅިން ތަފާތުކޮންނެވެ. 2021 ވަނަ އަހަރު ކުޑަ ޢީދު ދުވަހު އިހުގެ ވޮލީ ކުޅުންތެރިންނާއި ޒުވާނުންނާއި ކުޅެވުނު ވޮލީ މެޗެއްގެ ސަބަބުން ދެން ދުވަހަކުވެސް ނުދިރޭނެ ކަމަށް ހީކުރި ވޮލީގެ ފޯރި މާއުނގޫދޫގައި މިވަނީ ދިރިގެން ގޮސްފައެވެ. ޒުވާނުން މިހާރު ގެންދަނީ ވަރަށް ފޯރީގައި ވޮލީ ކުޅެމުންނެވެ. ކައިރި ރަށްރަށުގެ ޓީމްތަކާއިއެކު މެޗްތައް ކުޅުމަށް ވެސް ތިބީ ފިސާރި ތައްޔާރަށެވެ. ނަމަވެސް އެކަމަށް އޮތް ހުރަހަކަށް ވެފައި މިވަނީ ކޮވިޑް 19 ގެ އާލަމީ ވަބާއެވެ.
ވޮލީގެ ފޯރި މިހާރު ހުރިގޮތުން ފޯރިގަދަ މުބާރާތްތައް ފެނިގެން ދިއުމަކީވެސް ދުރުގައިވާކަމެއް ނޫނެވެ. އެހެންނަމަވެސް މިއަދު އޮތް އެންމެ ބޮޑު ގޮންޖެހުމަކީ ވޮލީކުޅެން އެކަށީގެންވާ ކޯޓެއްނެތުމެވެ. މާއުނގޫދުގެ ޒުވާނުން މިހާރު ބޭނުންވަނީ ވޮލީގެ ފޯރި ރަށުގައި ދިރުވައި ކުރީގައި އޮތް ހިސާބަށް އަލުން ގެންދާށެވެ. މިރަށުގައި ޒަމާނީ ވޮލީ ކޯޓެއް އެޅިގެން ދިއުމަކީ އެޒުވާނުން މިހާރު ދެކެމުންދާ ހުވަފެނެކެވެ.
Leave a Reply