މާއުނގޫދޫގައި ސަރުކާރުން ސުޓެޓިކް ކޮންޕެނީއާއި ހަވާލުކޮށްގެން ކުރިއަށް ގެންދާ ފެނާއި ނަރުދަމާ ނިޒާމް ގާއިމްކުރުމުގެ މަސައްކަތުގެ ތެރެއިން ނަރުދަމާ ނިޒާމްގެ ހޮޅިތަށް ވަޅުލަން ފަށައިފިއެވެ.
މިއަދު (20 ޖަނަވަރީ 2022) ހެނދުނު 11:11 ގައި މަސައްކަތް ވަނީ ރަސްމީކޮށް ފަށާފައެވެ. ނަރުދަމާ ނިޒާމުގެ ހޮޅިތައް ވަޅުލުން ފެށުމުގެ ގޮތުން ސުޓެޓިކް ކޮންޕެނީގެ ބައެއް ބޭފުޅުންނާއި އެކު މާއުނގޫދޫ ކައުންސިލް މެންބަރުން ވެސް ބައިވެރިވިއެވެ.
މަސައްކަތައް ފެށުމުގެ ތެރެއިން – ފޮޓޯ :މާއުނގޫދޫ.ކޮމް
ނަރުދަމާ ހޮޅިތައް ވަޅުލުމުގެ މަސައްކަތް ފަށާފައިވަނީ ފުއްޓަރުންނެވެ. އެގޮތުން ފުއްޓަރަށް ދެވެން އޮންނަ މަގުގެ އިރުން ހުޅަނގަށް ވަނީ ކޮންނަން ފަށާފައެވެ.
މި ޕުރޮޖެކްޓުގައި ހިމެނޭ ފެންހޮޅި ވަޅުލުމުގެ މަސައްކަތުގެ ބޮޑުބައެއް މިހާރު ނިމިފައިވާ ކަމަށް މައުލޫމާތު ލިބެއެވެ.
ފެނާއި ނަރުދަމާގެ ފެސިލިޓީ ބިލްޑިންގެވެސް ބޮޑުބައެއް މިހާރުވަނީ ނިންމާފައެވެ. މިހާރު ތައްޔާރުވަމުން ދަނީ ޓޭންކުތައް ބެހެއްޓުމަށް ބޭނުންވާ ބުޑުތައް ތައްޔާރު ކުރުމުގެ މަސައްކަތާއި ފެސިލިޓީ އިމާރާތުގެ ކަރަންޓުގެ މަސައްކަތް ތަކެވެ.
މި މަޝްރޫޢަކީ ސަރުކާރު ބަޖެޓުން 35 މިލިއަނަށްވުރެ ގިނަ ރުފިޔާ ހަރަދުކޮށްގެން ކުރިއަށްގެންދާ މަޝްރޫޢެކެވެ. 2019 ވަނަ އަހަރު ފެށި މިމަސައްކަތް ހަވާލުކޮށްފައިވަނީ ސުޓެޓިކް ކޮންޕެނީއާއެވެ.
މާއުނގޫދޫ ގައި ފެނާއި ނަރުދަމާ ނިޒާމް ގާއިމްކުރުމަކީ ރާއްޖޭގެ ރައީސުލްޖުމްހޫރިއްޔާގެ ރިޔާސީ ވަޢުދުތަކުގެ ތެރޭގައި ހިމެނިގެން ކުރަމުން އަންނަ މަސައްކަތެކެވެ. މިއީ މިރަށުގައި މިހާތަނަށް ހިންގޭ ތަރައްޤީގެ އެންމެ ބޮޑު އެއް ޕުރޮޖެކްޓެވެ.
މި ޚަބަރާއި ގުޅޭ އިތުރު ފޮޓޯތައް:
Leave a Reply