ޙަޤީޤީ އުފަލަކީ ކޮބައިތަ؟

ކުރިމައްޗަށް އައިސް މިހުށަހެޅުނީ ކޮން ސުވާލުމާކެއްތޯއެވެ؟ ކޮން ސިއްރެއް
އޭގައި ފޮރުވިފައިވާ ލަފްޒެއްތޯއެވެ؟ ވިސްނަ ވިސްނާވެސް ހިތްހަމަޖެހޭ މަޢުނައެއް
ނުވިސްނުނެވެ. ޖަވާބުދޭން އެނގޭނީ، ސުވާލު އެނގުނީމަ ނޫންތޯއެވެ؟
ކޮންމެއަކަސް ދުލަށް ވަރަށް ފަސޭހަ، ކިޔާލަން ވަރަށް ލުއި ޢިބާރާތެކެވެ.
ކޮށްލަން އެހައިމެ ފަސޭހަ ސުވާލެއްމެއެވެ. ނަމަވެސް ޖަވާބު އާދެ ! ޖަވާބަކީ ވިސްނައިގެން
ފިކުރުކޮށްގެން ނޫނީ، ހަމަގައިމުވެސް އަޅުގަ ނޑަށް ދެވޭނޭ އެއްޗެއް ނޫ ނެވެ. އެންމެ ފުރަތަމައިން
އެއްޗެއްގެ ޙަޤީޤަތަށް ވިސްނޭނީ، އެއެއްޗެއް އެނގިގެން ނޫންތޯއެވެ؟
ހާސްކަމުން ފުރިފައި ވަނިކޮށް، ހިތުގެ ޤުލްޝަނުން ރަބީޢުގެ ފެހިކަން ކެނޑި،
ޚަރީފްގެ އުދާސްތައް ވެރިކަން ކުރަނިކޮށް، ހިތް މުޅިން ކިލަނބުވެފައިވަނިކޮށް ކުއްލިއަކަށް
ކުރިމައްޗަށް މިއައި ސުވާލަކީ، [ޙަޤީޤީ އުފަލަކީ ކޮބައިހެއްޔެވެ] މިއެވެ. ޞަޙަރާގެ ބިމެއްގައި
އެއްވެސް ހިޔާވައްސެއް ނެތި އެކަނިވެރި ޙާލެއްގައި ހުރި ނިކަމެތި އިންސާނަކަށް ފުރިހަމަ
ޖަވާބެއް ދިނުމަކީ ފަސޭހަ ކަމަކަށްވާނެ ބާވައެވެ. ނުވަތަ އެއީ ކޮން އެއްޗެއްކަންކަން
ތަޖްރިބާއިން ނޭނގޭ މީހަކަށް ކެރިހުރެގެން ޖަވާބު ދިނުމަށް ކުރިމަތިލެވޭނޭބާވައެވެ !
ޝައްކެއްނެތެވެ. ނޭނގޭ އެއްޗަކަށް، ނުލިބޭ ތަޖްރިބާއަކަށް، ޤަލަމް ތުނޑުންވިޔަސް،
އަކުރުތަކެއްގެ ސިފަ ގެނައުމަކީ، ވުމަށްވުރެ ނުވުން ގާތް ކަމެކެވެ. ނަމަވެސް މަސައްކަތް
ކުރާނީ ވޭތޯ އެވެ. އަޅުގަ ނޑަށް ހީވާގޮތުގައި، އަނެކަކަށް ކޮށްދެވޭ ހެޔޮކަމަކުން ، ތިމާގެ ހިތަށް
އެލިބޭ ހަމަޖެހުމާއި ތަނަވަސްކަން އެއީވެސް ޙަޤީޤަތުގެ އުފަލެކެވެ. އަޅުގަ ނޑަށް ހީވާގޮތުގައި
ޙަޤީޤީ އުފަލަކީ، ވަރަށްގިނަ ރޮނގުން ހޯދިދާނޭ އެއްޗެކެވެ. މިގޮތުން ޙާޞިލް ކުރެވިދާނޭ
މަތިވެރި އުފަލެކެވެ. ނަމަވެސް، އެމަތިވެރި އުފާ އަޅުގަނޑުމެން ތެރެއިން ލިބެނީ ކިތައް
މީހުންނަށްބާވައޭ އަޅުގަނޑު ހިތަށް އަރައެވެ.
ނޫން ! ނޫން ! މަޢާފަށް އެދެމެވެ. އެހާގިނަ ގޮތްގޮތުން ހޯދޭ، އެހާ ތަނަވަސް
ފަސޭހަ ރޮނގު ރޮނގުން ޚާއްޞަ ކުރެވޭ އެއްޗެއް ކަމަށްވަންޏާ، ނުލިބޭނެ މީހުން ވަރަށްވެސް
މަދުވާނެ ކަމަށް އަޅުގަ ނޑުވެސް ޤަބޫލުކޮށްފީމެވެ.
އާދޭހެވެ ! ތިމާ އިޚްލާޞްތެރި ގޮތުގައި ކުރާ ކޮންމެ ކަމެއްގެ ފޮނި
ނަތީޖާއިންވެސް ލިބޭނީ ޙަޤީޤީ އުފާ ނޫން ދެވަނަ އެއްޗެއް ނޫނެވެ. އިޖްތިހާދު ހުރި ކިޔަވާ
ކުއްޖެއްގެ މައްޗަށް އަޅުގަ ނޑުމެންގެ ވިސްނުމުގެ އަލިކަން އަޅުވާލަމާ ހިންގަވާށެވެ! އެފަދަ
ކުއްޖަކީ ޙަޤީޤީ އުފަލުގެ ފަޚްރުވެރި ވެރިއެކެވެ. މީހުން ކިތަންމެ ތުން ފިއްތިޔަސް، މީހުންގެ
މޫނުތަކުން ކިތަންމެ ބަނަ ކުލަތަކެއް ދެއްކިޔަސް، މަލާމާތުގެ ޕޮއިންޓްތަކެއް އޭނާގެ ކުރިމަތީގައި

ހާމަކުޅަޔަސް، އޭނާގެ ތެދުވެރި މަސައްކަތުން ލިބެމުންދާނީ ވަޒަން ނުކުރެވޭނޭ މަތިވެރި ޙަޤީޤީ
އުފަލެވެ. އެފަދަ ކުއްޖަކީ އަޅުގަ ނޑުގެ ނަޒަރުގައި ދުނިޔޭގައިވާ އެންމެ ކިލަބެއް ނެތް، ސާފު،
މަތިވެރި އުފަލުގެ ޙައްޤުވެރިޔާއެވެ.
ދެން އަޅުގަ ނޑުގެ ވިސްނުމަށް އަންނަނީ މުޅީން އެހެން ކަހަލަ
މަންޒަރުތަކެކެވެ. ހަމަދެންމެ، ހަނދާނަށް އައި މިސާލުތަކެކެވެ. އާދޭހެވެ ! މީހުންގެ ދިރިއުޅުމާ
އަޅުގަ ނޑަށް ބެހިގަނެވެނީކަންނޭނގެއެވެ. ނަމަވެސް، މި ހާމަކުރާ މިސާލަށްވުރެ ވަކި ފަސޭހައިން
ޙަޤީޤީ އުފާ، ގިނަ މީހުންގެ ހިތަށް ވަންނާނެ ޢިބާރާތެއް ލަފްޒެއް އަޅުގަ ނޑުގެ ވިސްނުމަށް
ނައީއެވެ. އާދެ! ދެމީހުން ދެމެދު ފަސާދަކޮށް، އެދެމެދުގައި ފިތުނަ އުފެއްދުމަކީ، ބައެއް މީހުންގެ
އެންމެ މަތިވެރި އުފަލެވެ. ވައްކަން ކުރާ މީހުންނަށް އެކަން އެއީވެސް އެފަދަ މަތިވެރި
އުފަލެކެވެ. ނިދިނައިސްގެން ގޭގައި ނުއޮވެވިގެން އެހެން އެއްޗެއް ނުލިބުނިއްޔާ، ތިމާގެ އަމިއްލަ
މިލްކަކުން ނަމަވެސް، ވައްކަންކޮށް އުޅޭ ވާހަކަ އަޅުގަނޑު އަހަމެވެ. އަނެއް ބައެއްގެ
އުފަލަކަށް، މީހުން މެރުންވެސް ވެދެއެވެ. މިހިރީ ހައްތާ [ޙަޤީޤީ އުފަލެއް[ އާދެ! އެމީހުންގެ
ހިތަށާއި ރޫޙަށް އަރާމު ލިބޭ އުފަލެވެ.
ނިކަން ޙިޖާޖް ބުނި ޔޫސުފްގެ [މަތިވެރި ޙަޤީޤީ] އުފަލުން ވިސްނަވާލަ
ބައްލަވާށެވެ. ހަނދުމަފުޅު އާކޮށްލަބައްލަވާށެވެ. ޙައިރާންވެ ބިރުން ފިތްކަ ނޑައިގެން ނުދާނީ
ކާކުތޯއެވެ؟ އޭނާގެ އަނިޔާގައި، ޤަތުލު ކުރެވޭ މީހުންގެ ލޭ ފެނުމަށް، އޭނާގެ ހަށިގަ ނޑަށް
އަރާމާއި ލައްޒަތުދޭ އެއްވެސް ކަމެއް ނެތް ކަމުގައި ބުނާތީ އިވެއެވެ.
ނަމަވެސް އަޅުގަ ނޑުގެ ގާތުގައި ޙަޤީޤީ އުފަލަކީ، އެއެއް ނޫނެވެ. ފިސާރި
މާތް،މަތިވެރި މަޤްޞަދުތަކެއްގެ މައްޗަށް ބިނާވެގެންވާ އެއްޗެކެވެ. އެކަކަށްވުރެ ގިނަ މީހުންނަށް
ފައިދާއާއި އުފާވެރި ހަމަޖެހުން ގެންނަ އެއްޗެކެވެ. ޙަޤީޤަތުގައި ދިރިއުޅުން ބާއްޖަވެރިކުރާ
މަދަދުޤާރެކެވެ. އެކަނިވެރިކަން ފިލުވައިދޭ އެހީތެރި މިތުރެކެވެ. ޚިޔާލާއި ފިކުރު ތަނަވަސްކޮށްދޭ
ޔާރެކެވެ. އެފަދަ މަތިވެރި ޙަޤީޤީ އުފަލެއްގެ ފަޚްރުވެރި ވެރިޔަކީ، ދުނިޔޭގައިވާ ވަރަށްވެސް
ނަޞީބުގަދަ މީހެކެވެ. އަޅުގަ ނޑު ކުރީންވެސް ދެންނެވިފަދައިން އިންސާނަކަށް ޙަޤީޤީ އުފާ
ހޯދޭނެ ކިތަންމެ މަގުތަކެއްވެއެވެ. ނަމަވެސް އެމީހަކު ހޯދިއްޔާއެވެ. ލިބިގަތިއްޔާއެވެ. އެ
އުފަލަކީ، ޙަޤީޤީ އުފާ ކަމަށް ހެދިއްޔާއެވެ. ނުވަތަ އެއީ ޙަޤީޤީ އުފާކަން ދެނެގަތިއްޔާއެވެ. އެއީ
ކޮން ކޮން ޙާލަތެއްގައިތޯއެވެ؟……އާދެ! މި މަޟުމޫނު ލިޔާއިރު، އަޅުގަ ނޑަކީ ޠާލިބާއެއް ކަމެއް
ހިނދުކޮޅަކުވެސް ހިތަކުން ކެހިގެނެއް ނުދެއެވެ. މުސްތަޤްބަލުގައި، އަދާކުރަންޖެހޭނޭ ވާޖިބުތަކެއް
ނޯވެއެވެ. އަޅުގަ ނޑުގެ މަޤާމެއް އަޅުގަ ނޑަކަށް އަޅުގަ ނޑު އޮޅުވައެއްނުލައެވެ….އާދެ!
އުނގެނުމުގެ ޙާލަތުގައެވެ. އެނގެމުންދާ ޙާލަތުގައެވެ. އެނގެނީކަން އެނގޭ ޙާލަތުގައެވެ.
އެނގިއްޖެކަން އެނގުނު ޙާލަތުގައެވެ. ނަތީޖާ ފެންނަ ހިނދުގައެވެ. ފެންނަމުންދާ ހިނދުގައެވެ.

ޢަމަލުކުރަންޖެހޭ ވަގުތުގައެވެ. ޢަމަލުވެވެމުންދާ ދުވަސްތަކުގައެވެ. ޢަމަލީ މައިދާނުގައެވެ .
ދެންތޯއެވެ؟ ދެންވީ ދިރިއުޅުމުގެ ވަރުގަދަ ހަނގުރާމައާ ކުރިމަތިލާށެވެ. ކެރިހުރެގެން
އުންމީދާއެކު ޖޯޝާއެކުގައެވެ. އެނގުންތަކާއި ތަޖްރިބާތަކަށް ފިސާރި ލޯ ހުޅުވައިގެންނެވެ.
ނާކާމިޔާބުގެ ތެރެއިން ކާމިޔާބީ ހޯދަމުންނެވެ. ނާކާމިޔާބުގެ ތެރެއިން ތަޖްރިބާތައް ޙާޞިލު
ކުރަމުންނެވެ. ނާކާމިޔާބީގެ ތެރެއިން ޙިކްމަތް ހޯދަމުންނެވެ. ޝައްކެއްނެތެވެ. ލިބެމުންދަނީ
އުފަލެވެ. އާޚިރު ނަތީޖާއަކަށްވާނީ، ދެމިހުންނަނިވި ޙަޤީޤީ އުފަލެވެ.