މާއުނގޫދޫ ސުކޫލްގެ 12 އަހަރުން ދަށުގެ ޓީމުން ފުނަދޫ ޔުނިޓީ ސުޕޯޓްސް އެކަޑަމީ ބަލިކޮށްފިއެވެ.
ފުނަދޫ ޔުނިޓީ ސުޕޯޓްސް އެކަޑަމީ ގެ ދަޢުވަތަށް މިއަދު ހަވީރު 4:30 ގައި މާއުނގޫދޫ ފުޓްސަލްދަނޑުގައި ކުޅެވުނު 12 އަހަރުން ދަށުގެ އެކުވެރިކަމުގެ ފުޓްސަލް ދެ މެޗު ވެސް ކާމިޔާބު ކޮށްފައިވަނީ މާއުނގޫދޫ ސުކޫލްގެ ޓީމުން ނެވެ.
ފުރަތަމަ މެޗު މާއުނގޫދޫ ސުކޫލްގެ 12 އަހަރުން ދަށުގެ ޓީމުން ކާމިޔާބު ކުރީ ތަފާތު ބޮޑު ނަތީޖާ އަކުންނެވެ. އެގޮތުން މި މެޗު ގައި މާއުނގޫދޫ ސުކޫލްގެ ޓީމުން ވަނީ ޔުނިޓީ ސުޕޯޓްސް އެކަޑަމީ ކޮޅަށް 7 ލަނޑު ޖަހާފައެވެ. މެޗު ފެށިގެން ފުރަތަމަ މިނެޓްގެ ތެރޭގައި މާއުނގޫދޫ ސުކޫލްގެ ޓީމުން ވަނީ ޔުނިޓީ ސުޕޯޓްސް އެކަޑަމީގެ ގޯލް ހުޅުވާލާފައެވެ. މި ލަނޑު އެ ޓީމަށް ކާމިޔާބު ކޮށް ދީނީ މާއުނގޫދޫ ސުކޫލް ޓީމުގެ އިބްރާހިމް ޒިމާމުއެވެ. މެޗުގެ ފުރަތަމަ ހާފް ގައި މެޗުގައި މޮޅަށް ކުޅެފައިވަނީވެސް މާއުނގޫދޫ ސުކޫލްގެ ޓީމުން ނެވެ. މެޗުގެ ފުރަތަމަ ހާފު ނިންމާލާފައިވަނީ 3 ލަނޑުގެ ލީޑެއްގައެވެ.
ދެވަނަ ހާފް ފެށިގެން ވެސް މާއުނގޫދޫ ސުކޫލްގެ ޓީމުން ރަނގަޅު ކުޅުމެއް ދައްކަމުން ދިޔައެވެ. މި މެޗު ގައި މާއުނގޫދޫ ސުކޫލްގެ ޓީމުގެ ލަނޑުތައް ޖަހާފައިވަނީ ޒިމާމްގެ އިތުރުން ޝާދު، ޒާއިން އެވެ.
ދެވަނަ މެޗު ގައި ޔުނިޓީ ސުޕޯޓްސް އެކަޑަމީގެ ޓީމުގެ ފަރާތުން ރަނގަޅު ކުޅުމެއް ފެނިގެން ދިޔައެވެ. އެގޮތުން މެޗުގެ ވަރަށް ކުރީކޮޅު ޔުނިޓީ ސުޕޯޓްސް އެކަޑަމީން ލަނޑެއް ކާމިޔާބު ކޮށް ލީޑުނެގިއެވެ. އޭގެ ކުޑަ އިރުކޮޅެއް ފަހުން މާއުނގޫދޫ ސުކޫލްގެ ޓީމުން ލަނޑެއް ޖަހައި މެޗުގެ ނަތީޖާ ހަމަހަމަ ކުރިއެވެ. އޭގެ އިރު ކޮޅެއް ފަހުން މާއުނގޫދޫ ސުކޫލްގެ ޓީމުން އިތުރު ލަނޑެއް ޖަހައި މެޗްގައި ލީޑް ނެގިއެވެ. މިމެޗުގައި ދެޓީމުގެ ފަރާތުން ވަރަށް ހަމަހަމަ ކުޅުމެއް ފެނިގެން ދިޔަ މެޗު ނިމުނީ 2 ލަނޑު 1 ލަނޑުން މާއުނގޫދޫ ސުކޫލްގެ ޓީމުން މެޗު ކާމިޔާބު ކޮށްގެނެވެ. މާއުނގޫދޫ ސުކޫލްގެ ދެ ލަނޑު ވެސް ކާމިޔާބު ކޮށް ދިނީ ޢަލީ ޝާއިން އެވެ.
މި މެޗަކީ މާއުނގޫދޫގެ ތާރީޚުގައިވެސް މިހާ ހަގު އުމުރެއްގެ ކުދިންތަކެއް ވާދަވެރި މެޗެއް ކުޅުނު ފުރަތަމަ ފަހަރުކަން ފާހަގަކޮށްލެވެއެވެ.
Leave a Reply