ލާމަރުކަޒީ ގާނޫނުގެ 1-107 ގެ (ރ) ގެ ދަށުން ކައުންސިލުން ބޭއްވުމަށް ލާޒިމްކުރާ ރައްޔިތުންގެ ބައްދަލު ވުމުގެ މިދައުރުގެ ދެވަނަ ބައްދަލުވުން މިރޭ ބާއްވައިފި
މިބައްދަލުވުމުގައި މިއަހަރުގެ ފަހު 4 މަސް ދުވަހު މާއުނގޫދޫ ކައުންސިލުން ކޮށްފައިވާ ބައެއް މައުލޫމާތު ރައްޔިތުންނާއި ހިއްޞާކޮށްފައިވެއެވެ.
މިއަހަރުގެ ފަހު 4 މަސް ދުވަހު ކައުންސިލްގެ 10 ބައްދަލުވުމެއް ބާއްވާފައިވާކަމަށް ހާމަކޮށްފައިވެއެވެ. އެ ބައްދަލުވުންތަކުގައި ނިންމު މުހިންމު ކަންތައްތަކަށް ބަލާއިރު
އިޖްތިމާޢީ ސަރަހައްދު ބެލެހެއްޓުން ހަރުދަނާ ކުރުމާއި
އެމަސައްކަތް ކުރަނެބަޔަކު ހޯދުމުގެ އުސޫލް ފާސްކުރުމައި
ކައުންސިލް އިދާރާގެ މަރާމާތުގެ މަސައްކަތް ކުރުމަށް ފާސްކުރުމައި
- ގަބުރުސްތާނު ސާފުކުރުމަށް ފާސްކުރުމާއި
- މަސްޖިދުއް ރަޙީމްގެ ކުލައާކުރުން ފާސްކުރުމާއި
- ރިންގު ރޯޑް ހެދުމުގެ މަސައްކަތް ކުރުމަށް ފާސްކުރުން ފާހަގަކޮށްލެވެއެވެ.
މިހާރު ކައުންސިލުން ކުރަމުންދާ ކަންކަމުގެ ގޮތުގައި ފާހަގަ ކުރެވުނު ކަންކަމުގެ ތެރޭގައި
- އާއު އައުޓްޑޯ ޖިމަށް ބޭނުންވާ ސާމާނު ހޯދުމަށް ބަޔަކާއި ހަވާލުކޮށް ފެބުރުއަރީ މަހުގެ ތެރޭގައި ޢަމަލީ މަސައްކަތް ފެށުމަށް ތައްޔާރުވަމުން އަންނަކަމަށް މައުލޫމާތު ދެއްވި އެވެ.
- ރިންގު ރޯޑް ސަރަހައްދުގެ ތެރޭގައި ހިމެނޭ ރުއްތައް ކަނޑާ ސާފު ކުރުމުގެ މަސައްކަތް ކުރިއަށް ދާކަން ފާހަގަކުރެއްވިއެވެ.
- މާއުނގޫދޫ ކައުންސިލް އިދާރާ މަރާމާތު ކުރުމުގެ މަސައްކަތް ކުރިއަށް ދާކަން ފާހަގަކުރެވެއެވެ.
ކައުންސިލުން ސަރުކާރުގެ އިދާރާތަކައި ބައްދަލުކުރުމަށް ކުރި ދަތުރުގެ ތަފްސީލުވެސް މި ޖަލްސާ ގައި ހާމަކުރައްވާފައިވެއެވެ. މި ދަތުރު ކޮށްފައިވަނީ 27 ނޮވެމްބަރ އިން 1 ޑިސެމްބަރ 2021 އަށެވެ. މިދަތުރުގައި 3 މިނިސްޓްރީ އަކާއި ކައުންސިލުން ބައްދަލުކުރިއެވެ. އެއީ މިނިސްޓްރީ އޮފް އިސްލާމިކް އެފެއާޒް، މިނިސްޓްރީ އޮފް ޔޫތު ސުޕޯޓްސް އެންޑް ކޮމިއުނިޓީ އެންޕަވަރމަންޓް އަދި މިނިސްޓްރީ އޮފް ޕުލޭނިންގ ހައުސިން އެންޑް އިންފުރާސުޓުރަކްޗާ އާއި ބައްދަލުކުރައްވައިފައިވެއެވެ. މި ބައްދަލުވުންތަކުގައި ކުރެވުނު މަޝްވަރާތަކުން ފާހަގަ ކުރެވޭ ކަންކަމަށް ބަލާލާއިރު:
މިނިސްޓްރީ އޮފް އިސްލާމިކް އެފެއާޒާއި އެކު ބޭއްވުނު ބައްދަލުވުމުގައި މިސްކިތްތަކުގެ ޖާގައިގެ ދަތިކަމާއި އެކަން ޙައްލުކުރުމަށް ކުރެވިދާނެ ކަންކަމާއި ގުޅޭގޮތުން މަޝްވަރާކުރެވުނެވެ. މާއުނގޫދޫ އަށް އާމިސްކިތެއް ބޭނުންވާ ކަމަށް ކައުންސިލުން ވަނީ މިނިސްޓްރީ ގައި ދައްނަވާފައެވެ. މިބައްދަލުވުމުގައި ޖާގައިގެ ދަތިކަމަށް ވަގުތީ ހައްލެއް ހޯދުމުގެ ގޮތުން މިއަންނަ ރަމަޟާން މަސް ފެށުމުގެ ކުރިން މަސްޖިދުލް ރަޙީމްގެ ގޯތިތެރޭގައި މިނިސްޓްރީގެ އެހީތެރިކަމާއިއެކު މާބުލްސް ޖެހުމަށް ނިންމައި އެކަން ފެށުމަށް ތައްޔާރުވަމުންދާކަމަށް މަޢުލޫމާތު ދެއްވިއެވެ.
މިނިސްޓްރީ އޮފް ޔޫތު ސުޕޯޓްސް އެންޑް ކޮމިއުނިޓީ އެންޕަވަރމަންޓާއި އެކު ކުރެވުނު މަޝްވަރާގައި މާއުނގޫދޫގެ ކުޅިވަރު ވަޞީލަތްތަކަށް ދިމާވެފައިވާ މައްސަލަތައް ހައްލުކުރާނެ ގޮތްތަކާއިމެދު މަޝްވަރާކުރެވިފައިވެއެވެ. އަދި ޔޫތު ސެންޓަރު ޤާއިމްކުރުމަށްޓަކައި ފައިސާގެ އެހީ ދިނުމަށް މިނިސްޓްރީ އިން ވަނީ ނިންމާފައެވެ. މިމަސައްކަތުގެ ތެރޭން އީގޭމިން ސެންޓަރާއި ބައެއް ކުޅިވަރު ސާމާނު ހޯދިގެން ދާނެކަމަށް މައުލޫމާތުލިބެއެވެ.
މިނިސްޓްރީ އޮފް ޕުލޭނިންގ ހައުސިން އެންޑް އިންފުރާސުޓުރަކްޗާ އެކު ކުރެވުނު މަޝްވަރާތަކުގައި މާއުނގޫދޫ ގައި ޒަމާނީ އައު ބަނދަރެއް ހެދުމުގެ މަސައްކަތް އަވަސްކުރުމަށާއި މިހާރު ހުރި ދަތިތަކާއި ގުޅޭގޮތުން މަޝްވަރާކުރެވުނެވެ. އަދި ސާވޭގެ މަސައްކަތް ނިންމައި އަންނަ އަހަރުގެ ފެބްރުއަރީ މަހުގެ ނިޔަލަށް ކޮންޓުރެކްޓް ކުރެވިގެން ދާނެކަމުގެ ޔަޤީންކަން މިނިސްޓްރީ ވަނީ ދެއްވާފައެވެ.
މިދައުރުގެ ރައްޔިތުންގެ ތިންވަނަ ބައްދަލުވުން އަންނަ އަހަރުގެ ފެބްރުއަރީ މަހުގެ ތެރޭގައި އޮންނާނެކަންވެސް މިބައްދަލުވުމުގައި ހާމަކުރެއްވިއެވެ.
Leave a Reply