ލޯބިވުމާއި ނަފްރަތުކުރުން މިއީ އިންސާނާގެ ކިބައިގައި ވާ ދެ ޝުޢޫރެކެވެ. އޭނާ މީރު ކާ އެއްޗެއްސަށް ލޯބިކުރެއެވެ. ރީތި މަންޒަރަށް ލޯބިކުރެއެވެ. ފިރިހެނުން އަންހެނުން ދެކެ ލޯބިވެއެވެ. ފަހަރެއްގައި އޭނާ އަންހެނެއް ދެކެ ލޯބިވަމުން ގޮސް ޢިޝްޤުގެ ދަރަޖައަށް ވެސް ހިނގައިދާނެއެވެ. އޭރުން އަޅުކަމެކޭ ބުނެވިދާނެ ދަރަޖައަކަށް ވެސް ފަހަރެއްގައި އޭނާ ކަންތައް ކޮށްފާނެއެވެ. އެހެން ނަމަވެސް އެ ލޯތްބަކީ ވެސް އިންސާނުން އެއްބަޔަކު އަނެއްބަޔަކު ދެކެވާ ލޯބީގައިހެން، އޭގައި ވަކި ހައްދެއް އޮންނަ ލޯތްބެކެވެ.
އަހަރެމެން ލޯބިވާއިރު ލޯބިވަނީ އެއިން ލިބޭ މަންފާއަކަށްޓަކައެވެ. ނުވަތަ މަޢްޝޫޤު ގާތުގައި ހުރުމުން ލިބޭއުފަލަށްޓަކައެވެ. އެހެންވެ ލޯބިވެރިއާއަށް، ލެޕްރެސީ ކަހަލަ ސިފަހުތުރުކޮށްލާ ބައްޔެއް ޖެހިއްޖެއްޔާ، ނުވަތަ އޭނާގެ ޗާލުކަން ހިނގައްޖެއްޔާ، ނުވަތަ މީރު ކާއެއްޗެއްގައި ފޫޖަހައިފިއްޔާ، ނުވަތަ މަންޒަރު ބަދަލުވެ އޭގެ ރީތިކަން ހިނގައްޖެއްޔާ، އެއްކަލަ ލޯބި ވެސް ނެތިގެންދާނެއެވެ. ކިއެއްތަ، އެ ލޯބި ނުރުހުމަކަށް ވެސް ބަދަލުވެދާނެއެވެ.
ނަމަވެސް މުއުމިނަކު، މާތް الله ދެކެ ވާ ލޯތްބަކީ، އެއީ ހިފެހެއްޓުމެއް ނެތް ލޯތްބެކެވެ. އެއްވެސް ހައްދެއް ނެތް
ލޯތްބެކެވެ. ޙަޤީޤަތުގައި މި ދުނިޔެއިން އަހަރެމެން ލޯބިވާ އެއްޗެއް ދެކެ ލޯބިވަނީ ވެސް، އެ އުފައްދަވާ އޭގެ
ބޭނުން ހިފޭނެގޮތް މެދުވެރިކުރެއްވި، އެ ފެނުމުން ނުވަތަ އަތްލުމުން އުފާވާނެ ގޮތް މެދުވެރި ކުރެއްވި މާތް
ރަސްކަލާނގެ ދެކެ ވާ ލޯތްބެއްގެ ގޮތުގައެވެ.
އިންސާނާއަކީ ވަރަށް ގިނަ އެއްޗެހިތަކެއް ދެކެ ބިރުގަންނަ މަޚްލޫޤެއް ވެސް މެއެވެ. އަނދައަނދާ ހުންނައަލިފާންގަ ނޑު ދެކެ އޭނާ ބިރުގަނައެވެ. ވަހުޝީ ޖަނަވާރު ދެކެ ބިރުގަނެއެވެ. ގަދަ ވިހަ ދެކެ ބިރުގަނެއެވެ.ވަރުގަދަ އަނިޔާވެރިން ދެކެ ވެސް ބިރުގަނެއެވެ. ނަމަވެސް މި ބިރަކީ ވެސް ވަކި ވަރަކަށް، ވަކި ހައްދަކަށް ގަންނަ ބިރެކެވެ. ބިރުގަތް އެތިން ނުވަތަ ބިރުގަތް ނުރައްކަލުން ސަލާމަތްވާނެކަން އެނގި، އޭގެ ގެއްލުމެއް ތިމާއަށް ނުފޯރާނެކަން ޔަޤީންވުމުން، ބިރުކެނޑިގެން ދެއެވެ. ނަމަވެސް الله ދެކެ އަހަރެމެން ގަންނަ ބިރަކީ އެއީ އޭގައި ވަކި ވަރެއް، ވަކި ހައްދެއް ނުވާ ބިރެކެވެ.
الله ދެކެ ލޯބިވުމާއި ބިރުގަތުން އެއީ އެއްކައުވަންތަ ކުރުމުގައި އޮތް އަސާސްތަކުގެ ތެރެއިން އަސާސެކެވެ. އަދި މިއީ އަޅުކަން ކުރުމުގެ ރޫޙެވެ. ނަމަވެސް މިތާ ފާހަ ގަކޮލަން ޖެހޭ ކަމެއް އެބަ އޮތެވެ. އެއީ މާތް الله ދެކެ ލޯބިވުމަކީ، އިބްނު އަލްފާރިޟް ހެދިހެން، الله އަށް ޣަޒަލް ޅެން ހެދުމެއް ނޫނެވެ. އަދި އެ ކަލާނގެ ދެކެވާ
ލޯތްބަކީ އެއީ، ރާބިޢާ އަލްޢަދަވިއްޔާ އަށް މީހުން ނިސްބަތްކޮށް އުޅޭހެން، ކަލާނގެ ދެކެ ވާ ޢިޝްޤޭ ބުނެ ނަން ދިނުމެއް ވެސް ނޫނެވެ. އަދި މާތް الله ދެކެ ބިރުގަތުމަކީ ބިރުބޮޑުވެގެން ގޮސް، ނަފްރަތަކަށް ބަދަލުވުމެއް ވެސް ނޫނެވެ. ބިރުން ހާސްވެގެން ގޮސް، ހަމަބުއްދި ގެއްލޭވަރުވުމެއް ވެސް ނޫނެވެ. މާތް الله ދެކެ ލޯބިވާނީ، އެ ކަލާނގެއަށް ކިޔަމަންތެރިވެ، ޝައިޠާނާގެ ވަސްވާސްތަކާއި ނަފްސުގެ ޝަހުވަތަށް ވުރެ، އެ ކަލާނގެ ރުހިވޮޑިގަތުން އިސްކޮށްގެންނެވެ. އަދި އެ ކަލާނގެ ރަސޫލާ -ޞައްލަالله ޢަލައިހި ވަސައްލަމަ – ގެންނެވި ހުރިހާ ކަމަކަށް ތަބާވެގެންނެވެ.
ވީމާ، މާތް الله ދެކެ ލޯބިވާކަން ބެލޭ މިންގަ ނޑަކީ ކީރިތި ރަސޫލާ -ޞައްލަالله ޢަލައިހި ވަސައްލަމަ – އަށް ތަބާވާ ވަރެކެވެ. އަދި އެ ކަލާނގެ ދެކެ ބިރުގަންނަކަން ބެލޭ މިންގަ ނޑަކީ އެ ކަލާނގެ ނަހީކުރައްވާފައިވާ ކަންތަކާ ދުރުވެ، މި ދުނިޔޭގައި ފާފަކޮށްގެން އުފާ ހޯދުމަށް ވުރެ އާޚިރަތުގެ ޘަވާބު ހޯދުން އިސްކުރާ ވަރެކެވެ.
އަނެއްކާ، މާތް الله އަށް ކިޔަމަންގަތުމަކީ ފަހަރެއްގައި ވެސް އެކަލާނގެ މަޚްލޫޤަކަށް ކިޔަމަންގަތުން ފަދަ ކަމެއް ނޫނެވެ. އަހަރެމެން ބައެއް އިންސާނުންނަށް ކިޔަމަންގަންނަމެވެ. މި ގޮތުން ރަސޫލާއަށް ކިޔަމަން ގަންނަނީ الله އަމުރުފުޅު ކުރެއްވީތީއެވެ. އަދި ބައެއް ފަހަރު މީހާގެ ޠަބީޢަތު ހުންނަ ގޮތުން ނުވަތަ، މީހެއްގެ ނުރައްކަލަށް ބިރުން ވެސް މީހަކު މީހަކަށް ކިޔަމަން ގަނެފާނެއެވެ. މިސާލެއްގެ ގޮތުން ބަލަންޏާ، ރައްޔިތުން ވެރިއާއަށް ކިޔަމަން އެބަގަނެއެވެ. ދަރިފުޅު ބައްޕައަށް ކިޔަމަން އެބަގަނެއެވެ. އަނބިމީހާ ފިރިމީހާއަށް ކިޔަމަން އެބަގަނެއެވެ. ހެޔޮކަމެއް ކޮށްދީފައި ހުރި މީހަކު ކަމަކު ކިޔައިފިއްޔާ އެއީ އޭނާއަށް ގެއްލުމެއް ނެތް ކަމެއްވިއްޔާ އެކަން އެބަ ކޮށްދެއެވެ.
އަދި ފަހަރެއްގައި ކިޔަމަންގަންނަން މަޖްބޫރު ކުރެވުނީމާ، ލިބިދާނެ ގެއްލުމެއްގެ ބިރަށްޓަކައި ވެސް ކިޔަމަންގަނެފާނެއެވެ. ނަމަވެސް މި ހުރިހާ ކިޔަމަންގަތުމަކީ ވެސް (ރަސޫލާއަށް ކިޔަމަންގަތުން ފިޔަވައި، އެހެނީ އެއީ الله އަށް ގަނެވޭ ކިޔަމަނެއް) ވަކި ހައްދަކާ ޖެހެންދެން ގަންނަ ކިޔަމަނެކެވެ. ހައްދެއް ނެތް މުޠްލަޤު ކިޔަމަންގަތުމެއް ނޫނެވެ. އެހެނީ ހައްދެއް ނެތް މުޠްލަޤު ކިޔަމަންގަތުން އެއީ ހަމައެކަނި މާތް الله އަށް ވާންޖެހޭ އެއްޗެކެވެ. ހުރިހާ ކަމެއްގައި ވެސް އެކަލާނގެއަށް ކިޔަމަންގަންނަން ޖެހެއެވެ. އަހަރެމެން ހިތް އެދޭ ކަންތަކުގައްޔާއި ހިތް ނޭދޭކަންތަކުގައި ވެސް، އެ ކަލާނގެއަށް ކިޔަމަންތެރިވާންޖެހެއެވެ. އަހަރެމެންނަށް އޭގެ ޙިކްމަތް އެނގޭ ކަންތަކުގައްޔާއި ޙިކްމަތް ނޭނގޭ ކަންތަކުގައި ވެސް، އެ ކަލާނގެއަށް ކިޔަމަންތެރި ވާންޖެހެއެވެ. މި ކިޔަމަންތެރި ކަމަކީ އެ ކަލާނގެ ދެކެވާ ލޯބީގެ މޭވާއެވެ. އަދި މި ކަމަށް ދަލީލުކޮށްދޭ އެއްޗަކީ ވެސް އެއީއެވެ.
Leave a Reply