ށ. މާއުނގޫދޫ އައު އިންޖީނުގެއާއި އޮފީސް އިމާރާތް ކުރުމުގެ މަސައްކަތް ކޮށްދޭނެ ފަރާތެއް ހޯދުމަށް ފެނަކަ ކޯޕަރޭޝަން ލިމިޓެޑުން އިޢުލާން ކޮށްފިއެވެ.
މިކަމާއި ގުޅިގެން 07 ސެޕްޓެމްބަރ 2021 ގައި އެ ކުންފުނިން ކޮށްފައިވާ އިޢުލާނުގައި ބުނެފައި ވަނީ އެ ކުންފުނިން ދޭ ކުރެހުމާއި ބީ.އޯ.ކިޔު އަދި މަޢުލޫމާތާއި އެއްގޮތަށް ށ. މާއުނގޫދޫގައި އައު އިންޖީނުގެ އާއި އޮފީސް އިމާރާތް ކުރުމުގެ މަސައްކަތް އެ ކުންފުނީގެ ތަކެތީގައި ކޮށްދޭނެ ފަރާތެއް ހޯދުމަށް ބޭނުންވާ ކަމަށެވެ.
އިންޖީނުގޭގެ މަސައްކަތް ކުރާނެ ބަޔަކު ހޯދުމަށް އަލުން އިޢުލާން ކޮށްފައިމިވަނީ ކުރިން އެމަސައްކަތް ހަވާލުކުރެވިފައިވާ ކުންފުނިން އެކަށީގެންވާ ހަލުވިމިނެއްގައި އެމަސައްކަތް ކުރަމުން ނުދާތީއެވެ. ވޭތުވެދިޔަ ދުވަސްތަކުގައި އެމަސައްކަތް ކުރިއަށް ގެންދިޔަ ކުންފުނިން ހަމައެކަނި ކުރެވިފައިވަނީ ބިން ސާފުކޮށް އޮފީސް އިމާރާތުގެ ކޮންކްރީޓް މަސައްކަތާއި އިންޖީނު ރޫމްގެ ކޮންކްރީޓް މަސައްކަތް ރޫްފް ބީމްއާއި ހަމައަށް ނިންމުމެވެ.
ބިޑްގައި ބައިވެރިވުމަށް ރަޖިސްޓްރީ ވާން ބޭނުންވާ ފަރާތްތަކުން 08 ސެޕްޓެމްބަރ އިން 21 ސެޕްޓެމްބަރ ގެ ނިޔަލަށް ރިޖިސްޓަރީ ވުމުގެ ކަންކަން ކުރިއަށް ގެންދިޔުމަށް ބުނެފައިވާއިރު، މި މަސައްކަތާއި ގުޅޭ މަޢުލޫމާތު ސާފުކުރުމަށް ބުނެފައިވާ އެންމެ ފަހު ތާރީޚަކީ 20 ސެޕްޓެމްބަރ 2021 އެވެ. މި މަސައްކަތަށް އެދި އަންދާސީ ހިސާބު ހުށަހެޅުމަށް ދީފައިވާ އެންމެ ފަހު ތާރީޚަކީ 22 ސެޕްޓެމްބަރ 2021 އެވެ.
މި ބިޑްގައި ރަޖިސްޓްރީ ވުމުގެ އެންމެހާ ކަންކަން އީ-މެއިލްގެ ޒަރިއްޔާއިން ކުރިއަށް ގެންދިޔުމަށް ނިންމާފައިވާއިރު ބިޑްގައި ބައިވެރިވުމަށް ރަޖިސްޓްރީ ކުރެއްވުމަށް ބޭނުންވާ ފަރާތްތަކުން ކުންފުނީގެ ފުރިހަމަ ނަމާއި، އިޢުލާން ނަމްބަރާއި އަދި ނަމާއި ފޯނު ނަމްބަރު tender@fenaka.mv މި މެއިލް އެޑްރެސްއަށް މެއިލް ކުރެއްވުމަށް އެ ކުންފުނިން ވަނީ އެދިލައްވާފައެވެ.
މި މަސައްކަތަށް ޝައުޤުވެރިވެލައްވާ ފަރާތްތަކުން މަތީގައި ބަޔާންކުރެވިފައިވާ ތާރީޚުތަކާއި އެއްގޮތަށް ރަޖިސްޓްރީ ކުރެއްވުމަށްފަހު އަންދާސީ ހިސާބު ހުށަހަޅަމުން ގެންދިޔުމަށާއި، އަދި އަންދާސީ ހިސާބު މެއިލް ކުރައްވާ ފަރާތްތަކަށް “ރެޖިސްޓްރޭޝަން ކޮންފޮމޭޝަން” ގެ ގޮތުގައި އެ ކުންފުނީގެ މެއިލްއެއް ލިބިލައްވާނެ ކަމުގައި އެ އިޢުލާނުގައި ބުނެފައިވެއެވެ.
Leave a Reply