މާއުނގޫދޫ ކައުންސިލުން އިމާރާތް ކުރުމަށް މަސައްކަތް ކުރަމުންދާ “ރައްވެހި ހިޔާ” އިމާރާތުގެ ކުރެހުންތަކާއި ބީއޯކިއު ތައްޔާރުކޮށްދޭނެ ފަރާތެއް ހޯދުމަށް ޢިއުލާނު ކޮށްފިއެވެ.
ޒަމާނީ ފެންވަރުގެ ރައްވެހި ހިޔާއެއް އިމާރާތްކުރުމަކީ ނިމިދިޔަ ކައުންސިލް އިންތިޙާބުގައި އެމް.ޑީ.ޕީން ކުރިމަތިލި ކެނޑިޑޭޓުންގެ މެނިފެސްޓޯގައި ހިމެނިފައިވާ ވަޢުދެކެވެ. ކައުންސިލުން ރައްވެހި ހިޔާ އިމާރާތްކުރުމަށް ގެންގުޅެމުންދާ ވިސްނުން ސާފުކޮށްލުމަށް މިނޫހުން ކައުންސިލްގެ ރައީސްއަށް ދެންނެވުމުން ކައުންސިލްގެ ރައީސް ވިދާޅުވީ މިއަދު ކައުންސިލްގެ ބައްދަލުވުމަކުން ރައްވެހި ހިޔާ އިމާރާތް ކުރާނެ ބިން ފާސްކުރެވިފައިވާ ކަމަށެވެ. އެގޮތުން މިހާރު ނިންމާފައިވަނީ ކުރީގެ ރިކޯޑް ހުރި ހުސްބިމުގައި ދެފަންގިފިލާއަށް ރައްވެހި ހިޔާހެދުމަށްކަމަށެވެ. އެގޮތުން އެއިމާރާތުގައި ކޮންފަރެންސް ހޯލަކާއި، ކޮޓަރިތަކެއްގެ އިތުރުން ކެފޭއެއް ހެދިގެން ދާނެކަމަށް މައުލޫމާތު ދެއްވިއެވެ.
މާއުނގޫދޫ ކައުންސިލުން އިމާރާތް ކުރުމަށް މަސައްކަތް ކުރަމުންދާ “ރައްވެހި ހިޔާ” ގެ ކުރެހުންތަކާއި ބީ.އޯ.ކިޔު ކައުންސިލުން ފޯރުކޮށްދޭ މަޢުލޫމާތާއި އެއްގޮތަށް ތައްޔާރުކޮށްދޭން ބޭނުންވާ ފަރާތްތަކުން ބީލަމުގައި ރަޖިސްޓްރީ ވުމަށްއެދޭ ފޯމް ފުރިހަމަ ކުރެއްވުމަށްފަހު 30 އޯގަސްޓް 2021 ވާ ހޯމަ ދުވަހުގެ 14:00 ގެ ކުރިން ކައުންސިލް އިދާރާއަށް ހުށަހެޅުއްވުމުން ނުވަތަ info@maaungooodhoo.gov.mv އަށް މެއިލް ކުރެއްވުމުން މަޢުލޫމާތު ކަރުދާސް ފޯރުކޮށްދެވޭނެކަމަށް ކައުންސިލުން ހާމަކުރައްވައެވެ.
ބީލަން ބަލައިގަތުމާއި ހުޅުވުން އޮންނާނީ 2021 ސެޕްޓެމްބަރ 06 ވާ ހޯމަދުވަހުގެ 13:00 ގައި ކައުންސިލް އިދާރާގައެވެ. ހުށައެޅޭ ބީލަންތައް ހުންނަންވާނީ ސިޓީއުރައެއްގައި ބަންދުކުރެވި، ސިޓީ އުރައިގެ ބޭރުގައި ހުށައަޅާ ފަރާތުގެ މަޢުލޫމާތާއި އިޢުލާނު ނަމްބަރ އެގޭ ގޮތަށް ލޭބަލް ކުރެވިފައެވެ. އިތުރު މަޢުލޫމާތު ސާފްކުރެއްވުމަށް ރަސްމީ ގަޑީގައި 6540056 ނަމްބަރ ފޯނާއި ގުޅުއްވުން ކައުންސިލުން އެދެއެވެ.
އައުކައުންސިލް ހުވާކުރުމަށްފަހު މިވީ 3 މަސްދުވަހު ރައްޔިތުންގެ އިޙުސާސްތައް ދެނެގަނެ ވީ ވަޢުދުތައް ފުއްދުމުގެ މަސައްކަތް ވަރަށްބާރަށް ކުރިއަށް ގެންދާކަންވަނީ ފާހަގަކުރެވިފައެވެ. އެގޮތުން ފާހަގަކުރެވޭ މުހިއްމު ކަންކަމުގެ ތެރޭގައި ނާސަރީ އަދި ބޭބީ ނާސަރީގެ ޙިދުމަށް ހިލޭކުރުން އަދި އޮޑިވެރިންގެ ޝަކުވާ އަޑުއަހައި ހުޅަނގުކޮޅު ތޮށިގަނޑު މަރާމާތުކުރުން ފާހަގަ ކުރެވެއެވެ. މާއުނގޫދޫ ކައުންސިލަކީ އެމް.ޑީ.ޕީ މެޖޯރިޓީ ކައުންސިލެކެވެ.
Leave a Reply